Aizawl : Health Minister Dr R. Lalthangliana’n Mizoram mamawh hrang hrang chung- changa sorkar laipui hotute dawr turin kar kalta khan Delhi a pan a. Ministry of Micro, Small & Medium Enterprises (MSMEs) Secretary B.B. Swain leh official pawimawhte hmu nghalin, Mizorama Industry hrang hrangte tihchangtlunna tur chungchang a sawipui.
Luangmual, Aizawl, Lunglei, Champhai, Kolasib leh hmun hrang hranga factory complex dinna tura deptt-in project an thehluhte MSMEs Secretary chu sawipuiin, lo tihhlawhtlin ngei an tum thuin an lo chhang niin sorkar thuchhuah chuan a tarlang a. Thla hnih hnu velah Union Minister pawhin Mizoram tlawh a tum thu a lo hrilh nia tarlan a ni.
Health Minister chuan Zirtawpni khan Ministry of Ayush-a Joint secretary D. Senthil Pandiyan leh official dangte pawh kawmin, Ayush Directorate hnuaia thawktu hrang hrangte hlawh chungchang leh state sorkarin harsatna a tawhte a sawipui a. Joint secretary chuan Mizoram chu Ayush dispensary 30 pek a nih tur thu a lo hrilh niin sorkar thuchuhah chuan a tarlang a. District hrang hranga Ayush hospital dinna tura hmalak mek a nih dan te a lo hrilh nia tarlan a ni bawk.
Dr R Lalthangliana chuan Union Health Secretary Dr. Rajesh Bhushan pawh hmuin, ZMC tihhmasawnna tura DPR thehluh tawh chungchang leh pawimawh dang te a sawipui a. Union Health Secretary chuan a lo ngaihtuah zui tur thuin a lo chhang a. Mizoram health minister-in harsatna hrang hrang a thlen te pawh sutkianpui a tum thuin a lo chhang niin Mizoram sorkar thuchhuah chuan a tarlang.
NITI Aayog member, Health changtu Dr. VK Paul pawh hmu tawhin, Dr R Lalthanglia- na chuan hospital hrang hranga hman tur X-ray khawl ngaihtuahpui turin a ngen a. Dr. VK Paul chuan puih a inhuam thu lo hrilhin, ZMC tihchangtlun nana one time assistance awm thei te ngaihtuahsak tura ngenna chungchangah pawh ngaihtuahna a lo sen tur thu a sawi niin sorkar thuchhuah chuan a tarlang.
Health Minister Dr R Lalthangliana chuan Takeo Konishsan, Country Director leh Nilaya Mitash, Principal Operations Coordination Specialist, Asian Development Bank te pawh hmuin, Mizoram sorkar Finance deptt-in Healthcare scheme atana sum an puk tura chak zawka hmalak dan tur te a sawipui a,Ministry of Mining-a Secretary Alok Tandon pawh hmuin National Green Tribunal order avanga mining lama hmalaka tura environmental clearance a ngaih tak thu leh chumi atana NABET Consultant rawih na tur sum ngaihtuahsak turin a ngen a. Ministry of Home Affairs (Border management)-a Joint Secretary Sunil Kumar Barnwal pawh hmuin, Bangladesh leh Myanmar ram tena ramria insumdawn tawnna tur atana hmalakna tur pawimawhte a sawipui a. Land Port Authority of India (LPAI) ten MHA a DPR an lo thehluh tawh Cabinet-a ngaihtuah tura chhawpchhuak rang turin a thlen a, border haat din chungchangte, Tuipui ‘D’ Darzo kaia lei dawhna atana land acquisition tihfel te leh hmalak zel dan tur te pawh a thlen niin sorkar thuchhuah chuan a tarlang bawk.