Tottenham in huntawp dawn hun pek belh minute ruknaah Harry Kane hmangin an si phurh an sut a. Inkhel boruak sang, hmuhnawm leh thil thleng tamnaah Chelsea nen 2-2 in an inhnehtawk.
Pathianni zanah Stamford Bridge-ah tun season a London derby hmasa ber khelh a ni a. London khawlum hnuaiah team pahnih inkhel boruak a sang a, a inkhel ve lo pawn lama coach pahnihte inkar boruak a sang lehzual.Khelmual chhungah
Mahni mualah Chelsea in first half-ah inkhel an kaihruai a, chan tha zawk an ni thin a, an ball inpek kual a that thin zawk avangin goal khung mai tur an ang zawk fo.
Minute 19-naah an phu ang ngeiin goal an khung a, goal khungtu erawh beisei loh niin mi thar Marc Cucurella chu defender thar tho Kalidou Koulibaly chuan mawi tak maiin a ‘volley’ lut.
Spurs in awmze nei thui taka an khingpuite laka football an khelh hleihtheih loh avangin Chelsea tan chak chu a hautak zui dawn lo a ang hman a. An hlauhawm insiam ve thin pawh a hmawr bawk thei lovin Kane-a’n an chance neih that ber a hloh.
Mahse minute 68-naah goal an khung a, an goal in sawi a hlawh. Pierre-Emile Hojbjerg chuan goal khungin goal luh hma a Rodrigo Bentancur in Kai Havertz a ti tlu chu Chelsea in foul an hmuh loh avangin an lawm lo hle a. Team pahnihte inhnial buaiin boruak a sang.
Chelsea in minute 77-naah Reece Hames hmangin goal an khung nawn leh a. Hei hi Chelsea in an chakpui mai dawn niin a lang tawh. Mahse Ivan Perisic-a corner chu Kane-a’n huntawp dawnah a tauh lut a. Inkhel hmuhnawm atangin point khat ve ve an hawn.Khelmual pawn lam
Manager pahnih inkar boruak a ‘hot’ a, vawi khat chauh ni lo rik hat an nei.
Tottenham goal hmasa zawk a luhin Chelsea boss Thomas Tuchel leh Spurs hotu Antonio Conte te pawh then an ngai a, yellow card pek an ni.
Chelsea in goal an khung nawn lehin Tuchel-a lawm chu khelmual sirah a tlan kual a, Spurs technical area lamah Conte hmaah a tlan kher. Hei hian boruak a tisang zual.
Inkhel zawhah an pahnih hian tha takin an inchibai mai a, hetah hian pawh then ngai bawka awm lehin an inchhang leh hman a. Red card pek ve ve an ngai.Eng nge an sawi?
Tuchel-a chuan, “Khua a lum a, bench leh khelmual boruak a sang. Season tan tir a ni a, hetiang boruak sang neih hi hmuhnawm a ni ve bawk.” tiin a sawi a, a hranpa a inhuat tawnna an neih loh thu a sawi.
Inkhel zawh lam boruak sawifiahin, “Inkhel zawhah tha takin kan inchibai turah ka ngai a, inelna boruak a ni tih kan hrethiam tlang tih a lanna turah ka ngai. Mahse ngaihdan dang a nei a, mi pawh en tha mang lovin kal pah takin a ti a, thil tul lo a ni. Thil tul lo a thleng hnem hle.” a ti.
Lehlamah Conte pawhin buaina a awm lem lo tih a sawi ve bawk a, “Engemaw buaina a lo awm a nih pawhin amah leh kei inkar a ni a, sawi kher a tul lo. Vawiin boruak hrim hrim kha kan nuam tih chi a ni.”
“Nidangah chuan kha aia kalpah lo deuhin ka ti tawh a, tha taka inchibai a inkalsan mai tur kha a ni. Inkhelh lai pawhin kan bench-ah ka awm anga, ani pawh an bench-ah a awm hle hle tur a ni.” a ti ve bawk.
Chelsea coach Tuchel hian referee thutlukna inkhel zawhah a sawisel nual a, hemi chungchang hi FA chuan a ngaihven dawn.