Mexico-a thil laih chhuahna khura tang mi 10-te chhanchhuah hna thawh mek chu khur chhunga tui tling chim chin a san thar leh avangin a buaithlak hle.
Thil lai chhuaktute hi August 3 khan leiverh bang a chim avangin an tang a, a bul chiah chamber-a tuite chu shaft pathum awmah a luh bawk avangin pawh mai theih an ni lo.
Thuneitute chuan tui chim chin hi metre 1.5 vela a tlakhniam avangin him taka shaft-ah hian an luh theih an inbeisei hman a; mahse, Pathianni khan metre 20 chuanga sang a chim leh tih an sawi.
Khur awmna, Coahuila state governor chuan tuite hi shaft chhungah hian a bul chiaha khur hluihlawn tawh atanga lut niin a sawi a. Governor Miguel Riquelme chuan a putna lai hi engineer-ten an zawng mek a, an hmuh chuan an tihtawp theih an inbeisei.
Shaft atang hian tui litre maktaduai 200 chuan pump chhuah a ni tawh a; mahse, a luh belh zel avangin chhanchhuah hna hi a thawh hleih theih loh.
Kar hmasa khan tui chhunga kaltir thei drone chu thlalakna nen shaft pakhatah tirh luh a ni.
Khur chhunga tang mek chhungte chuan drone tirh luh hmang hian rei tak an nghah tawh, an chhungte dinhmun chu hriat theih an inbeisei a, chhiatna thlen atanga ni 12 hnuah pawh an thi nge an dam hriatna tur engmah a la awm lo.
Drone hian an tanna hmun ni ngeia an hriat mawng erawh a thleng thei ta lo hlauh a ni.
“Tuiah hian thil sakhat leh fawn burh burh a tam hle a, thlalaknain a lakte pawh chiang taka hmuh theih a ni hlawm lo,” tiin sorkar chuan thu a chhuah.
“Hetiang dinhmunah chuan mi zawngtu leh chhan chhuaktute tirh luh ngawt theih a ni lo,” an ti bawk.
Tang mek chhungte hi chhanchhuah hna thawh a chak lo lutuk chu an thinrim hle a, an thlen chin pawh thawktute hnen atang hian an hre lo hle niin an sawi bawk.
“Thuneitute hnen atang hian eng nge thleng tih hriat kan duh. Tui hi khawiah nge a put tih leh engvangin nge a put tih hriat kan duh a ni,” tiin tang mek, Sergio Cruz-a chhungte zinga pakhat chuan Reuters news agency hnenah a sawi.
A bul hnaia puithiam awmte chuan chhanchhuah an nih ngei theih nan an tawngtaipui mek.