Trinamool Congress MP pahnih chuan Pathianni khan district danga party thil tia an chhuak haw lam, Agartala an panna kawngah vawi hnih beih an tawk niin an sawi.
Aparupa Poddar leh Dola Sen hian South Tripura district-a Belonia khaw bul, state khawpui atanga km 70 chuanga hlaa an chuanna car chu beih a ni tih an sawi.
Leirawhchana vawm an ni a, car hma darthlalang leh a tukverh a fuh a. Sen-i assistant, Zakir chuan a lu-ah hliam a tuar a, MP-te hian anmahni beitute hian BJP flag an keng niin an sawi bawk.
West Bengal Chief Minister Mamata Banerjee chuan Sen-i hi phone nghalin ‘ramhnuai lal’ chuan hun rei tak a daih tawh dawn lo tih a sawi.
MP pahnih leh Zakir te hi Kolkata-ah damdawi tlan turin an kal zui nghal.
BJP chuan heng thil thlengah hian inhnamhnawihna an nei lo tih an sawi nghal a. Nabadal Banik chuan Trinamool-in chanchinbu hip nan leh buaina chawh chhuah nan an phuahchawp a nih thu a sawi.
Trinamool MP pahnihin beih an tawh hi a hma ni chiaha thuthar lakhawmtute an kawm hnua thleng a ni a. Poddar-i ngei pawh hian Chief Minister Biplab Kumar Deb chuan na taka beiin a dinhmun pheh hun tur a chhiar tan mek niin a sawi.
MP-te hi Tripura-a Independence Day hmang bakah an party-in infiamna lam tihhmasawnna tura Thawhtannia Khela Hobe Divas an tan tur puala zin an ni a. West Bengal piah lama huang an zauhna tura hma an lakna a ni bawk.