Aizawl: India-in zalenna a hmuh champha vawi 76-na chu nimin zing khan BJP Mizoram Pradesh chuan an pisa-ah an lawm a. Vanlalhmuaka, State President-in India Hnam Puanzar pawt pharhin thu a sawi a, ei rukna hnungkhirha retheihna leh harsatna lak atan zalenna hi Mizoramin a mamawh tih a sawi.
Vanlalhmuaka chuan India ram zalenna champha lawm mek lai hian Mizoram pawh hian harsatna leh retheihna lak ata zalenna a hmuh ve theih nan, Narendra Modi kaihhruai BJP party hi kum 2023-ah thlan tlin a ngai tawh tih a sawi a. “Mizoram hmabak hi Mizote kutah a awm avangin a chhiat kan phal lo a, ei rukna hnungkhirha retheihna leh harsatna lak ata zalenna kan ramin kan mamawh tawh a ni,” a ti.
“Mizote hian kan thatna tur pawh hi kan hmu thiam lo fo thin. India rama kan awm hian zalen takin hun kan hmang thei a, sakhua avangin emaw, chi leh chi avangin emaw, harsatna lian tham kan tawk ta ngai miah lo te hi a lawmawm hle a ni,” a ti bawk.
He hunah hian thusawi tura sawm a nih angin PC Lawmkunga, IAS (rtd) pawhin thu sawiin, India flag hi miin hlauhawm zawng leh Hindu kaihhnawih anga sawi awm chu mak a tih thu a sawi a. “India Flag hi hlauhawmna a awm lo,” a ti.