Chief Minister Zoramthanga’n nimin khan Pachhunga University College-in kawng hrang hranga hlawhtlinna an chan te avanga lawmthu sawina an buatsaih a hmanpui a. PUC-in kawng hrang hranga hlawhtlinna an chan chu a lawmpui thu leh chhuanawm a tih a sawi.
Zoramthanga chuan PUC chu hmarchhak state-ah zirna kawnga a tha ber dinhmun hauh pha an nih thu sawiin, khawtlang rawngbawlna - thisen pek, faina, thingphun uar leh ramngaw humhalh kawngah pawh hmahruaitu an nih thu a sawi a. "Academic line chauh ni lo, kawng dang tam takah hlawhtlinna ropui tak tak an hmu chho mek a ni", a ti.
Chief Minister chuan "Mizoramin hmelma lian tak kan hmachhawn mek - damdawi hmansual te, HIV, cancer leh natna dang hluar em em te, kan khawtlang nun tibuaitu thil thalote hi do turin thalaite an pawimawh" a ti a. PUC-a zirlai leh zirtirtute chu fuihin an college atanga bul tana, college dangte leh thalaite tan entawntlak ni thei tur khawpa tan la turin a chah.
PUC hian July ni 20-21, 2022 chhung khan National assessment and accreditation council (NAAC) assessment an hmachhawna, July ni 26, 2022 ah Accreditation A+ Grade pek niin, cumulative grade point average (CGPA) 3.37 an hmu a, India hmarchhaka NAAC A+ College pahnih awmah a score sang zawk niin, Hmarchhak college zinga NAAC grading a score sangber a ni.
Sorkar laipuia Ministry of Education hnuaia India rama zirna sang dinhmun endiktu, National institutional ranking framework (NIRF)-in ranking an tihchhuah thar berah, PUC chu College category-ah 45-na niin, NIRF tehna atanga college tha zual 100 zingah hmarchhak atanga lang pha awmchhun an ni.
India ram chanchinbu lian, India Today-in kum 2022 chhunga College tha zual ‘The Best Colleges in India' a thlan chhuah zingah pawh PUC hi a tel a. Arts zirna-ah ram pumah 141-na niin, Science zirna-ah ram pumah 167-na leh Commerce zirna-ah 183-na a ni bawk.
PUC chu ramngaw neih that leh a humhalh kawnga a thawh that avangin India ra- ma hetiang lam end- iktu ‘Green Mentors’ Ahmedabad-in dinhmun sang ber ‘Platinum Rank’ kum 2021-2023 atan a pe a. Sorkar laipuia Ministry of Education-in Aizawl district-a ramngaw humhalh tha, vawng thianghlim leh bawlhhlawh sawngbawl tha chawimawina ‘District Green Champion 2021-2022’ chawimawina March 22, 2022 khan a hlan bawk a ni.
Kum riat chhung (2015-2022)-in PUC, NSS Unit-in zirna in zinga a thlawna thisen pe tam ber lawmman a dawng tawh a. Kuminah pawh thisen unit 651 pein, Educational Institution category-ah lawmman pakhatna a dawng leh bawk. Mizoram University hnuaia College hrang hrangte inelna ‘Varsity Sports’-ah kum 6 chhung (2016, 2017, 2018, 2019, 2021, 2022) ‘Overall Champion’ an ni thei a, a zawna champion rei ber an ni mek.
Department of Information & Communication Technology-in zirna in zinga website enkawl tha a thlan zingah pathumna an ni a, online-a admission kalpui dan ‘Best Online Service Initiatives’-ah pangana an ni bawk.