Aizawl : I&PR Minister Lalruatkima’n tunhnaiah Mizoram Police-a thubuai thehluh 1633 zinga 676 chu hlawhtling taka chhui zawh a nih thu sawiin, silai tawlhruk tum mi 20 man an nih thu leh thubuai 12 ziahluh a nih thu a sawi.
Serchhipa Independence Day a hmanpuinaah he thu hi Laqlruatkima chuan a sawi a. Serchhip district bikah kum kalta chhung khan thubuai 136 ziahluh a nih thu leh heng zinga 102 chu chargesheet niin mi 14 convict an ni tih a sawi.
Lalruatkima chuan Supreme court thupek bawhzuiin Police station leh outpost zawng zawngah CCTV leh audio recorder vuah mek a nih thu a sawi a. Hriselna lamah sorkarin hma a la nasa hle nia sawiin, Sub-centre tam tak chu Health & Wellness Centre-a hlankai tawh a nih thu leh hlankai mek zel a nih thu a sawi.
COVID19 laka invenna pawh nasa taka kalpui a nih thu Lalruatkima chuan sawiin, vaccine pek beihpui thlak reng a nih tuh a sawi a. Inen- kawlna hmanruate pawh kawng hrang hranga dap a nih tuh leh Serchhip district hospital-ah pawh October, 2021 khan PSA Oxygen Plant hawn a nih thu leh sorkar sum bakah Bawrhsap te thahnemngaihnaa Corporate social responsibility sum thahnem tak hmuh a nih thu a sawi bawk.
RD deptt. hnathawh hrang hrang pawh sawiin, MGNREGA hmangin kum kal mekah inhlawhna ni 40 siam a nih tawh thu a sawi a. MzSRLM leh BADP hmanga hmalaknate, PMKSY version 2.0 hmanga N. Vanlaiphai leh Lungkawlha hmalak tan a nih thute leh sorkar hmalakna dang hrang hrang te a sawi bawk a ni.