Bihar Chief Minister Nitish Kumar chuan a cabinet tilianin Thawhlehni khan minister thar 31 lak luh an ni.
A thachhangdawltu thar, Tejashwi Yadav nena lak luh an nih atanga ni reilo teah Kumar hian a sorkar a tilian a. Minister atana lak luh zinga 16 hi Lalu Prasad Yadav-a kaihhruai RJD mite an ni a. Kumar-a kaihhruai JD(U) atangin 11 an tel bawk a; an thawhpui dang, Congress atangin mi pahnih lak luh an ni bawk.
Minister thar zingah hian deputy chief minister u, Lalu Yadav-a fa upa ber, Tej Pratap Yadav pawh a tel a ni.
Bihar-ah hian cabinet-ah minister 36 an awm thei a, an hna chanpual tur hi he thu ziah lai thleng hian tihfel a la ni lo va, tihfel thuai a ni ang.
Chief minister chuan home department a chang dawn niin news agency ANI chuan a tar lang a. Tejashwi chu health minister ni tura sawi a ni bawk.
Vijay Kumar Chaudhary chuan finance department changin RJD hruaitu, Tej Pratap Yadav chu environment minister tura sawi rik a ni.
Tar lan tawh thin angin kar liam ta khan Kumar-a hian BJP nena an thawh dunna a titawp thut a. Kum 2017-a a lo chhuahsan tawh, Mahagathbandhan-ah kir lehin sorkarna a siam zui ta tho a ni.
Assembly-a member 243 awmah a kaihhruai JD(U) chuan MLA 43 neiin RJD hian hetiang zat let dawn an nei thung.
Bihar-a sorkar tharin cabinet an tihlen mek lai hian Kumar-a hova sorkar siam thin, BJP chuan Thawhlehni zan khan state core committee an ko va, party chief JP Nadda-a’n a ho dawn.
Bihar-ah hian RJD, Congress leh JD(U) an inzawm thar leh hian kum 2024 inthlan turah BJP paih thla ngei tura bul an tanna nia ngaih a ni.
Hetih lai hian Kumar hian prime minister nih tum anga sawi awm chu a hnawl a. Eptu a nih pawhin lungrual taka kal chu a thupui a nih thu a sawi.
Kumar-ah hian Thawhtanni khan an state-ah hna nuai 20 an la dawn tih a puang a, hei hi a hmaa RJD-in nuai 10 an lo puan tawh let thawk a ni.
An inthen hnuah BJP leh Kumar-a party chu na tak taka inbeiin an inpuh tawn a. Saffron party hian JD(U) chu an ral mai dawn niin an sawi.
Bihar-a BJP telna sorkar a tluk hma lawk hian Maharashtra-ah NCP-Congress-Shiv Sena sorkar chu Sena MLA Eknath Shinde-a leh a hote an hel avangin a lo tlu tawh a. BJP thawhpui zuiin sorkar thar a ding a, Shinde hi chief minister niin BJP hruaitu, Devendra Fadnavis chu deputy atan lak luh a ni.
Maharashtra-ah hian Shinde leh Fadnavis lak luh an nih hnuah ni 40 a liam tawh a, cabinet tihlen a la awm lo va, hei hi eptute pawhin beihna atan an hmang tan mek.KUMARA VUAKVET
Kumar-a hian home department changin a deputy, Tejashwi Yadav chuan health bakah road construction, urban development, housing & rural development a chan hmel a. A u-in environment a chang ang.
JD(U) chuan sorkar hmasaa an minister zingah Mohd Zama Khan, Jayant Raj, Sheela Kumari, Sunil Kumar, Sanjay Jha, Madan Sahni, Shravan Kumar, Ashok Choudhary, Leshi Singh, Vijay Kumar Chaudhary leh Bijendra Yadav an la lut leh.
RJD atangin Tej Pratap Yadav, Alok Mehta, Surendra Prasad Yadav and Ramanand Yadav, Kumar Sarvajeet, Lalit Yadav, Samir Kumar Mahaseth, Chandrashekhar, Jitendra Kumar Rai, Anita Devi and Sudhakar Singh, Israel Mansuri, Surendra Ram, Kartikeya Singh, Shahnawaz Alam leh Shamim Ahmed te lak luh an ni.
Congress MLA pahnih, Afaque Alam leh Murari Lal Gautam chu cabinet-ah lak luh an ni a, Santosh Suman chu Jitan Ram Manjhi-a kaihhruai, Hindustani Awam Morcha atanga lak luh niin independent MLA awm chhun, Sumit Kumar Singh pawh cabinet minister atan lak luh a ni.
Bihar Grand Alliance hian MLA 163 an nei a, independent MLA pakhat nen 164 an ni ta a. Sorkar thar hi August 24-ah buk a ni dawn.