MZP Sub-Headquarters, Lungsen chuan Gov’t Lungsen High School-a zirtirtu sawn chhuah a nih avanga lungawi lohna lantir nan nimin atang khan tiamchin awm lovin naupang sikul kai tur an dang.
Gov’t Lungsen High School-a zirtirtu (reqular teacher) chu sawn chhuah an ni a, sawn chhuah an nih hi MZP Sub-Headquarters chuan hrethiam loin August 11, 2022 khan transfer order an lo hal tawh a ni.
Zirtirtu sawn chhuah an duh lohzia hi education minister leh school education director pawh MZP hian an hriattir tawh tih thuchhuah an siamah tar langin, an thu thlenin awmzia a neih tak loh avangin hreh tak chungin an thil phut nawrna atan sikul kai tur dan chu an kaltlangpui ta tih an sawi.
Lungsen MZP chuan zirlai sikul kai tur danga an hmalaknate hian awmzia a nei lo a nih chuan na zawka hmalak zel an tum thu sawiin, sorkar pawhin zirlaite harsatna hrethiama a rang lama Gov’t Lungsen High School harsatna hi sukiang turin an ngen bawk.
Gov’t Lungsen High School-ah hian headmaster hoin regular teacher pakhat, SEDP atanga rawih zirtirtu pathum leh MLA Fund atanga rawih pakhat an awm mek a, Hindi teacher dah thar hian tun academic session tharah ni li chiah sikul a la kai nia thudawn a ni a, Science teacher transfer order hi July 27, 2022 khan tihchhuah a ni.