Mizo hockey player chhuanvawr, Birmingham 2022 Commonwealth Games a Women's Hockey a bronze medalist Lalremsiami chuan Thawhlehni khan Mizoram a lo thleng a. Lengpui a hmuahna hun hman a nih hnuah Kolasib lamah hmuahna hun an hmang.
Sports & Youth Affairs Board Vice Chairman TC Pachhunga, Sports & Youth Services Department Secretary Dr Lalrozama, sorkar mi pawimawhte, sports discipline hrang hranga infiammite, sports association hrang hranga hruaitute leh mipui thahnem takin Lengpui Airport-ah Siami hi an hmuak.
Lengpui Airport-ah hian hmuahna inkhawm tawi hman a ni a. He hunah hian Lalremsiami chuan a hlawhtlinna Mizoram mipuiin an lo lawmpui a, sorkar in a puala hun an buatsaih chu ropui a tih thu a sawi a. A medal hawn chu ama ta bik ni lovin Mizote ta liau liau a nih thu a sawi.
Lengpui atang Kolasib pan nghalin Thawhlehni tlai khan DC Circuit House-ah hmuahna hun hi Kolasib Deputy Commissioner John LT Sanga hovin an hmang ve leh a ni.