Tum leh beisei anga a film thar, ‘Laal Singh Chadda’ a chet that hleih theih loh vangin Aamir Khan chuan MNS hotupa Raj Thackeray hmu in, eng thil nge a sawipui hriat ni lo mah se, tunhma lama filmstar leh producer te’n a malsawmna leh tanpuina an dil ang kha a beisei nia ngaih a ni.
Maharashtra Navnirman Sena (MNS) hotupa Raj Thackeray chenna In ah nimin piah tlai lam dar 4 vel khan Aamir Khan hi a kal a, darkar khat hun a hmang.
Raj Thackeray hi tunhma atang tawh khan film siamtute leh filmstar te’n a tanpuina leh thlawpna an lo ngen tawh thin a, Bollywood inkhuarna Mumbai leh Maharashtra state pumpui ang pawha huhang ngah leh thiltithei tak a nih vangin Bollywood pawh hian a zai a ngai deuh chawt thin a ni.
‘Laal Singh Chadda’ film-in Boycott thlipui hmachhawn a, box office lamah a talbuai lai tak a nih vangin engti ang takin nge a tha lam zawnga a hawi leh thei ang ang, tih chu zawhna langsar tak niin, Aamir Khan hian MNS hotupa a hmuh hi a hlawkpui ang em, tih te pawh hunin a rawn hril thuai turah an ngai.