- Ruata
Royal Enfield bike model-a a man tlawm ber ni thin Royal Enfield Bullet 350, Standard 350 tia a sawi thin bawk chu tunhnaiah a thar an enchhinna thlalak a darh leh nasa tawh a. He bike hi Hunter 350 an tlangzarh hnua Royal Enfield in an tlangzarh leh tur niin a lang a, an tlangzarh har tawh loh hmel bawk a ni.
Bullet 350 hi hman atang tawha design ngaia la chhuak reng India ram huap pawha Royal Enfield bike model hrang hnem pawl tak a ni a. Hmanlai atanga Royal Enfield bike design la chhuak ngar ngar a ni a, hei hi India mi, mi tam takin an hlut chhan leh an duh em em chhan ni te pawhin a lang a. A mawiin he design la chhuak reng hi a hlu em em a ni.
Tunhnaiah he Chennai a inkulh lirthei ke hnih nei siamtu Royal Enfield hian bike thar Hunter 350 an tlangzarh a. Hei hi chi 2 awmin hengte hi – Retro leh Metro te a ni a. A man tlawm ber Retro hi Rs Nuai 1.50 man niin Metro Rs Nuai 1.64 – 1.69 lakh inkar man a ni thung a ni.
Tuna rawn chhuak leh tura beisei Royal Enfield Bullet nen hi chuan a design pawh hrang hlak a ni a, Bullet 350 chu kan lo hmuh fo tawh ang, Royal Enfield bike hlui ho design nei a ni. Hunter 350 tlangzarh zawhah hian new-generation Royal Enfield Bullet 350 hi tlangzarh tura beisei a ni reng tawh a, tunah hian company lam chuan a ni tur leh a lirthei awm dan tur an la puangzar lemlo a ni.
Royal Enfield Bullet 350 chhuan thar lo chhuak tur hian sawi tawh angin Royal Enfield original retro design a rawn la neih chhunzawm dawn a. Hetah hian headlamp, rear view mirrors, indicators, pilot lights leh taillamp bial kan hmuh hmel a. He bike thar turah hian a headlamp, taillamp leh rear view mirror bawrah bawrah chrome treatment chi thar deuh kan hmu dawn a ni.
Bullet 350 thar tur hian single-piece stepped seat a nei leh ang a, lumbar support tha lehzual a neih hmel a ni. Handlebar parh tha tak, wire-spoke wheel leh single-sided exhaust canister a neih chhunzawm zel ang a. Suspension lamah chuan conventional telescopic fork a hmalamah a nei ang a, a hnungah hian twin shock absorber a nei dawn bawk a ni. Braking lamah chuan a hmalamah disc brake neiin a hnunglam drum brake a ni ang a, hei hi a hmaa kan hmuh thin ang tho a ni dawn a ni. He bike hian single-channel ABS (antilock braking system) a nei leh dawn bawk a ni.
New-generation Classic ang chiahin all-new Bullet hian a khawl lamah chuan Meteor 350 a rawn tawm ve tho dawn a. Hei hi 346cc, single-cylinder, air-cooled motor, 5-speed gearbox nei a ni ang a. Hei hian peak power 20.2bhp leh 27Nm torque a pechhuak thei a ni. Royal Enfield Bullet 350 chhuak thar tur hi ‘J’ platform nghahchhana duan a rawn ni tawh dawn a. Hei hi RE Meteor leh new-gen Classic 350 te hman ang hi a ni dawn a ni. A man hi a hma aiin a danglam lutuk loh beisei a ni a, Royal Hunter ai chuan a to hret beisei a ni.
Reiloteah Royal Enfield bike design hlui leh hlun tak la chhawm nung zel bike chu a thar kan hmu dawn niin a lang a. Tuna Bullet 350 design ang chiah hi chu khawvel hmasawnna zel avangin kan hmu thei tawh dawn lo niin a lang bawk a.
Bike tha leh man to lo tak, mawi bawk si Royal Enfield atangin kan hmu leh thuai dawn niin a lang a. Eng ang takin Bullet 350 thar design hi a lan dawn tih hmuh a chakawm tawh hle a, la ngaihchan rih deuh erawh a ngai dawn a ni.