Aizawl : Institute of Advanced Studies in Education (IASE)-in nimin khan -Thanks Giving and Felicitation of University Rank Holders- hun an hmang a. Sports & Youth Services Minister Robert Romawia Royte-in a hmanpui.
Robert Romawia Royte chuan “Kan rilru put hmang, ngaihsan zawng leh kalphung zawng zawngte hi classroom zirna in atanga intan a ni a, engkim bul a ni” a ti a. “Zirlai hlawhtling chhuanawm te hian chawimawi an phu” tiin, anmahniah rah tha chhuahin midangte nunah pawh chona leh tumruhna a thlen a beisei thu a sawi a. “Tun hi a tawpna a nilo tih hriain, B.Ed Course leh M.Ed Course zir zawh piah lamah tih tur tam tak, hmabak thar tam tak a awm a ni tih hriat reng a pawimawh” a ti.
Hriatna, thiamna chu zirna atanga tan a nih avangin, zirna chu ram hmasawn nan a pawimawh hle tih Robert Romawia chuan a sawi a. “Zirtirtu ni tura training na hmun leh an intuai thar nana Institute pawimawh a thawkte hian hre reng se, hre thar fo bawk se” a ti bawk.
IASE hi kumina na B.Ed pass percentage 96.06% a ni a, distinction-ah mi 9 leh first division-ah mi 113 in an pass a. M.Ed pass percentage 92.5% niin, distinction-ah mi 5 leh first division-ah mi 32 in an pass. M.Ed ah top ten a tling 10 neiin, rank holder an ni vek a. B.Ed ah top ten rank holder 4 an nei bawk a ni.