Aizawl: Tuidam khuaa oil palm chingtuten kawng chhia avangin an thar chhuah an phur chhuak thei lo a, kawng chhia avanga oilpalm an hralh theih loh hi Rs nuai 10 man vel a tling tawh a; lo neitute chuan an harsatna tawh mek sutkiansak turin sorkarah an beisei hle.
Mamit district chhunga Tuidam khuaa chhungkaw thahnem tak chuan oilpalm huan an siam a, hei hi eizawnna pui bera an hman a ni.
Tun hnaia chanchinbumi thenkhatin a hmun a tlawhnaah Tuidam Zaua oilpalm chingtute chuan fur ruahtui tla nasa avangin an thlai thar phurh chhuahna kawng chu a chhe nasa hle tih an sawi a, tractor tak ngial pawh a kal theih loh chang a awm thin avangin an talbuai tawh hle tih an sawi.
Lo neitute chuan kawngchhia an buaipui dante chu chanchinbumite chu hrilhin, “Kawng chhia chu kan theih ang angin hnatlanga siamin oilpalm-te kan phur chhuak thin a, hetihlai hian leimin leh kawr tuiin kawng a tihchhiat nasat avangin July thla atang khan tractor takngial pawh a kal thei lo a, vawiin thlengin kan oilpalm-te an phur chhuak thei lo,” an ti.
Oilpalm thahnem tak hralh tur an neih tawh thu lo neitute chuan sawiin, kawng chhia vanga oilpalm an hralh theih loh hi Rs nuai 10 man vel a tling tawh tih Tuidam Zau hruaitute chuan an sawi bawk.
Tuidam Oilpalm Zau hruaitute chuan oilpalm an chin dawnin sorkarin zau anga hma an lak chuan an zau panna kawng pawh tha zawka siam a remchan tur thu an hrilh nia sawiin, “Kum 10 chuang a liam hnuah pawh kawng tha kan la nei lo hi sorkarin a tih tur a ti lo a ni,” an ti.
Tun dinhmuna an harsatna chu hrethiama an kuthnathawh rah an seng theihna turin an kawng chu tractor tal a kal theih nan sorkarin hma lakpui thuai se an duh tih an sawi bawk.