- Ruata
Tunhnaiah Mahindra company in Mahindra Thar chhuak thar tur, 5-door version an enchhin lai chu India ram kawngpuiah hmuh tur a awm leh ta a, heti a nih chuan a chhuak har leh vak dawn lo a nih hmel a ni.
Mahindra Thar hi lifestyle SUV leh offroader niin an siam chhan ang thlir chuan tuna a chhuah dan hi a tha tawk viau a. Nimahsela mi tam tak, mawi ti a neih ve chak si, an hmanna tur an thlira bungraw phurhna mumal awm lo leh mihring chuang tlem thei lutuk anihna avanga an iai lehsi a nihna chu tuna a chhuak thar tur hian a rawn tidanglam dawn a. Jeep Wrangler 5 door lian tha tak kan hmuh ang deuh hi a rawn ni tawh ang a, a hnung passenger te luhna tur kawngka a awm dawn mai bakah a hnunglehah bungraw phurhna tur hmun awl a awm dawn bawk a, hei hian Mahindra Thar leitu a rawn tihpun ngei a beiseiawm a ni.
Mahindra Thar chhuak mek hi chu offroad lam tuite leh hetiang body tawi neih hnial lemlo te tan a ni ber a. Kawng tam taka lirthei tangkai leh bungraw leng hnem a ni rih lemlo a, an siamchhan lutuk pawh a ni lemlo bawk a. Lifestyle SUV a nih angin Force Gurkha te ho ang bawkin a nih ang anga duh bik leh tuipui te ta tur a ni deuh ber rih a ni.
Mahindra chuan an enchhin tan chho mek a ni a, tunhnai tut tutah chuan an la tichhuak lo maithei a. Rei erawh a rei vak tawh lo turah ngai ila. Hei hi a lo chhuak anih chuan rei tak ata thawm lo nei tawh leh lirthei la chhuak rih mai lo pahnih 5-door Maruti Jimny leh 5-door Force Gurkha te nen a inel chho tura ngaih a ni a. Hei mai bakah hian SUV leitu tam takin an bawh lehzual pawh a rinawm a ni.
Beisei dan leh report thenkhatin an tarlan danin Mahindra Thar 5 door lo chhuak tur hian Scorpio chhuak thar Scorpio N-a kan hmuh ang ladder-frame chassis chak tha tak a rawn hmang ve dawn a. A sei zawngah erawh a inang lo hret maithei a, tuna Thar chhuak mek ai hian a sei ang a, Scorpio N chhuak thar ai erawh hi chuan a tawi hret beisei a ni. Mahindra Scorpio N-a awm ang pentalink rear suspension pawh a hman ve beisei a ni bawk a ni.
A sang zawng leh a vang lam hi tuna Mahindra Thar chhuak mek nen hian a inan beisei a ni a. Thutna tlar hnih zau nuam tak awm tur a nih dawn avangin a wheelbase hi a hma aiin a thui zawk ang a, 6 seater emaw 7 seater emawa a lo chhuah rin a ni.
A kentel lamah pawh tuna 3-door Thar in a neih ang tlangpui hi a rawn neih hmel a. A kentel turah hian 7-inch touchscreen infotainment system with the smartphone connectivity and navigation, 8-way adjustable front seats, coloured multi-info display instrument cluster, steering mounted controls, airbag tam tak, central locking, rear parking, hill start & descent assist, roll cage leh thildang hrang hrang a rawn tel beisei a ni a. A khawl lamah pawh tuna Mahindra Thar khawl ang hi a rawn hman chhunzawm hmel a, hetihrual hian a body a len hret tawh dawn avangin chak lehzual turin a khawl hi an khawih (tune) danglam maithei bawk a ni.
Engpawhnise, company lam atangin thuchiang puanzar a la awm lemlo a, dawhthei taka la nghah phawt a ngai rih dawn a. Mahindra Thar lei tum tan chuan an hmanna tur azirin a thar, 5-door hi a nghah chi viau maithei a. Hei erawh hman tumna azir a ni dawn a, offroad adventure lama tui leh a body tawi chhuak mek, 3-door mawi ti zawk tan erawh chuan thil nghah tul lutuk lo te pawh a ni thei ang chu. SUV thar tha leh hman tangkai theih tak tur erawh a lo chhuak leh thuai dawn niin a lang a, hei hi thu lawmawm tak a ni a tih theih awm e.