Tripura-a Sepahijala district, Kamal Nagar khuaa a ruka sorkar phal loh thil, ganja (cannabis) chinna daptu police leh khaw mite inkarah inphek sualna a thleng.
Khaw mite hian an thil chinna hmun dap tura kal police leh Border Security Force (BSF) sipaite chu nimin chawhnu khan an lo tibuai nia sawi a ni.
Sorkar phal loh thil, ganja chinte an tihchhiat mawlh mawlh lai hian khaw mi thenkhat hian an bei a. Thenkhat chuan tiang hmang leh hmanraw hriam dang an keng nia sawi a ni.
Khaw mite hian tualchher bomb hmangin an vawm bawk nia sawi a ni.
Venhim hna thawktute pawh theihtawpa tangin mittui tlakna hlo hmangin an kap a, mipui pung khawm hi an hnawt darh thei.
Sonamura SDPO Banaj Biplab chuan, “Police, BSF 74th Battalion mite, Forest Department mi pawimawh leh Narcotics Department-a thawkte hian khuaa miten dan phal lohva ganja an chinna hmunte dapin Rs Nuai khat man zet tur an tichhia,” a ti.
“Khaw mi thenkhat chuan a daptute hi an lo bei a, tualchher bomb hmangin an lo vawm bawk a, buaina lian zawk erawh a chhuak lo,” tiin Sonamura SDPO hian a sawi bawk.
Kamal Nagar khua hi India-Bangladesh ramri hnaih taka awm niin ganja chin hi an uar hle.
Sepahijala district pumah ganja hi an ching nasa hrim hrim a, an district-a huan neiten an sum hnar ber a ni.
Tum dangah pawh Sepahijala-a police leh venhim hna thawktu dangte hian ganja chinna hmun hi an lo dap tawh thin a, an tihchhiatsak tawh thin.