Sorkar laipuiin a nawr fo avangin September 1, 2022 atangin Motor Vehicles Act siam that chu Mizoramah hman tan a ni dawn tih Transport Department Commissioner & Secretary KT Beicho chuan sawiin, dan bawchhiaten sum tam zawk an chawi tawhna tur dan hi state sorkar sum harsatna avanga hman tur anga thuthang chu a dik lo tih a sawi.
Motor Vehicles (Amendment) Act 2019 hman tan a nih tur chungchangah KT Beicho chuan nimin tlai khan Transport Department Conference Hall-ah thuthar thehdarhtute a kawm a, The Zozam Times zawhna chhangin, “Sorkar pawisa neih loh vanga dan hi hmang tur kan ni lo a, sorkar laipui thupek vang zawk a ni,” a ti.
Dan siam that hman tur chungchang sawifiah nghalin, “Sorkar laipui chuan August, 2019 khan Motor Vehicles Act siam that hi September 1, 2019-a hman tan turin Gazette Notification a lo tichhuak tawh,” a ti a, he dan thara dan bawhchhiate sum chawi tur chu a san deuh avangin mipui tan phurrit a nih hlauhna avangin Mizoram sorkara transport department chuan fine hi tihniam tura hma a lo lak tawh thu a sawi.
KT Beicho chuan dan siam thar hi parliamentary legislation a nih avangin state sorkarin hemi zulzui hian dan hranpa siam emaw, fine-te a lo tihniam emaw a thiang lo tih sawiin, “Attorney General, Supreme Court thupek pawh a awm,” a ti a, he dan Mizorama hman tur chungchangah hian law & judicial department lam chu rawnin, an lo zirchiang a, anni pawh hian attorney general thupek anga kal tura departmet a hriattir angin he dan hi tidanglam loin Mizoramah pawh kalpui a ni dawn tih a sawi.
Motor Vehicles Act siam thata fine-te tihhniam tumin rei tak hman ni lo mah se sorkar laipuiin state-te chu an hman leh hman loh a zawt fo a, hmang tan tura a nawr reng avangin loh theih loin September atanga hman tan turin thuchhuah a siam ta tih Commissioner & Secretary chuan a sawi.
KT Beicho chuan chuan Motor Vehicles (Amendment) Act, 2019 chu dan bawhchhiate hremna tur a ni a, dan zawmtute tan chuan he dan hi a hlauhawm a awm lo tih a sawi a, “He dan avanga mi an lo fimkhur phaha road safety lama hma kan sawn phah ngei pawh sorkarin a beisei,” a ti.
Ministry of Road Transport & Highways thupek anga E-challan kalpui a nih tawh thu sawi bawkin, dan bawhchhetu tan pawh office-a kal ngai loin, mahni awm hmun atangin internet kaltlangin sum a chawi tur ang chu a chawi thei tawh tih a sawi bawk a ni.
Transport department hotute sawi danin dan thar hman turah hian hremna a sang hle dawn a, dan hluia awm lo, hman thar tur pawh a awm nual dawn a, hremna vantlanga dan hluia Rs 500 chawina thinah Rs 1,000 chawi a ngai tawh dawn a, dan tesep dangah pawh sum chawi tur leh lungin tang tura inhrem theihna chu a na zual tawh dawn a ni.