Aizawl: Aizawl South I bialtu MLA C Lalsawivunga chuan vohbik naupangte luhna, Shining Star Special School, Republic Veng tan Thawhtanni khan zirlaite lam leh thlahna atana hman turin lirthei, Eco Van a pe.
Lirthei inhlanna inkhawmah thu sawiin bialtu MLA chuan vohbikte bula awm chu a thlamuanthlakin nun a zalen thin thu a sawi a. Shining Star Special School kaltlang hian heng zirlai naupangte hian Pathian malsawmna an chan ngei a beisei tlat tih a sawi.
“He rawngbawlna hi Lal Isua duhzawng rawngbawlna a ni,” tiin, he hmuna thawktu zawng zawngte chu khawngaih rawngbawl hna thawh tur Lal Isuan an koa a nghat leh buatsaihsak chu a ropuiin fakawm a tih thu a sawi.
Aizawl khawpui, a bikin Aizawl chhim lama vohbik naupang, thluak leh taksa lam khawih rualbanlohna neite tana school din, Shining Star Special School hi kum li kaltaa Aizawl Republic Venga bul tan a ni a, zirlai pahnih chauha bul tan kha tunah hian zirlai 22 an nei tawh a. Zirlai nu leh pa leh mi thahnemngaite din, Society for Rehabilitation of Persons with Disabilities chuan a enkawl a ni.
Zirlaite hi veng hrang hranga mite an nih avangin anmahni leh a hruaitu an chhungte tan school-a thlah leh lamah harsatna a awm thin a, bialtu MLA hnena an dil angin a ni hian a MLA fund atangin Rs. nuai 5 chuang sengin Eco Van hi a ngaihtuahsak a. He society patron Lal M Dingliana, IFS (Rtd) kutah MLA hian a lehkha pawimawhte leh chabi a hlan a ni.