Aizawl: August 2,2022 zana car nena Sihhmui kai, lei dawh bula chesuala luia tlaa ni 20 zet chin hriat loha bo tawh, C. Lalfakzuala (39), Chatlang Lily veng ruang chu nimin khan hmuh a ni a, nizan khan vui liam a ni.
Sairang Dinthar YMA hruaitute hnen atanga thu dawn danin nimin chawhma dar 11:30 bawr vel khan Sairang Dinthar mi pahnih huana feh turte chuan Sairang lam atanga Buichali lei thlen hma deuh, GOP kai an tih bulah tuia mihring ruang bawhkhup zawnga lang an hmu a, an thian dangte punin an la chhuak ta a ni.
Ruang hmutute hian khawtlang hruaitute hriattir nghalin mihring thi taksa hi a chhiat tawh avangin tunge a ni tih hriat theih a ni lo a, hetih lai hian August 2, 2022 zana luia chesual, Lalfakzuala thawmhnaw ngei a ni tih finfiah a ni.
GOP kaia ruang lak chhuah a nih hnuah Sairang Dinthar YMA Hall-ah thlahna hun hman a ni a, hemi hnu hian Lengpui damdawi inah postmortem tih a ni a; nizan dar 7 khan a chenna inah vui liam a ni.
Tar lan tawh thin angin, C. Lalfakzuala leh a fapa, Malsawmkima (10) te chu luiah tlain ni rei tak chhung chu an chin hriat a ni lo a, mi thahnemngai tam takin zawn beihpui an thlak hial a, an chetsual atanga ni 17 hnuah kum 10 mi mipa naupang ruang hi hmuh a ni a, nimin khan a pa ruang hi hmuh leh a ni ta a ni.