Italian motorcycle racer, Ducati bike khalhtu Francesco Bagnaia chuan tun season-ah a zawna vawi thum nan intlansiakah pakhatna a hauh a. Austrian Grand Prix-ah a tlan chak ber.
Pathianni zana MotoGP season kallai a intlansiak 13-na hi Red Bull Ring tlankawngah tlan a ni a. Pahnihna atanga bul tanin lap khatnaah a hmasa ber atanga tlan tan Enea Bastianini chu a lehpel a, a tawp thleng hma a hruai tluan.
World championship a hmahruaitu ni mek Yamaha khalhtu Fabio Quartararo chuan pahnihna a hauh a. French rider hi intlansiak tawp lamah a tlanchak hle a. Dawhsan inchuh inum ah a dingchang a. Ducati khalhtu dang Jack Miller chuan pathumna a hauh.
Italian legend Valentino Rossi tih lova Italian mi a zawna vawi thum chak leh thei hmasa ber Bagnaia chuan, “Season chawhma lamah tihsual ka ngah lutuk a, hei vang hian ka fimkhur zual a ngai tawh. Tun intlansiak pawh a hautak a, a tawp thlen hlan a nghakhlelhawm hman hle.” tiin a chak hnuah a sawi.