Fisheries Minister K Lalrinliana’n Mizoram puma Sangha dil siam tawh zau zawng Hectare 5527.08 anga chhut a nih thu leh Sangha khawi mi 16588 awm mek anga chhinchhiah a nih thu a sawi.
Independence Day lawmna, tun thla ni 15-a Hnahthiala a hmanpuinaah he thu hi Fisheries Minister chuan a sawi a. Hnahthial district bikah Sangha dil nei mi 367 awm anga chhinchhiah a nih thu leh Hnahthial district-a Sangha dil zau zawng belhkhawm Hectare 32 anga chhinchhiah a nih thu a sawi.
Fisheries Minister chuan kum 2022 chhunga Mizorama Sangha thar zat quintal 45,750.50 anga chhut a nih thu pawh sawiin, Hnahthial district-a thar zat quintal 175 anga chhut a nih thu a sawi bawk.
Fisheries department-in Mizoram fisheries act hmanga Mizorama lui dungte humhalh tur leh awmze neia hman tangkai a nih theihna turin tan a la tih sawiin, K Lalrinliana chuan Fisheries act chuan hmuhnawm tur ringawta Sangha leh luia nungcha dang humhalh chu a tum ber a nih loh thu leh mi tam takin eizawnna an neih theihna tichereulo tawka dan phal china Sangha man te, an inthlah pung tur leh an fuanna hmun humhalhte, an inthlah pun hun laia Sangha man phal loh hun ‘closed season’ siam te, a chithlah pung tur an awm reng theihna tura humhalh burna hmun siam te a nih thu a sawi.
Sangha leh luia nungcha dang humhalh kawngah YMA branch tam takin hma an la mek tih sawiin, Fisheries Minister chuan tha zawka kalpui a nih theih nan CYMA nen pawh thawhhona thuthlung ziah a nih thu a sawi a. “Kan lui dung humhalhte hi khawtlangin sum kan hmuh letna turin kan hmang tangkai anga, Tourist hip nante pawh kan hmang tangkai chho zel dawn a ni” a ti.
Fisheries Minister chuan mahni khaw bula lui-te humhalhtu NGO/YMA te hnenah a theih anga tanpuina pek chho zel tum a nih tuh a sawi a. PMMSY (Pradhan Matri Matsya Sampada Yojana) hnuaiah kawng hrang hranga Mizoram fisheries-in hma a sawn theihna tura ruahmanna siam thin a nih thu a sawi.
RKVY hnuaiah fisheries hmasawnna atan tanpuina hrang hrang pekchhuah thin a nih thu pawh Fisheries Minister chuan sawiin, Sangha chi-a intodelhna turin Hatchery siamna tur 2020-2021 chhungin 5 pekchhuah a nih thu leh kum 2021-2022 chhungin 6 pekchhuah leh a nih tur thu a sawi.