Aamir Khan channa, ‘Laal Singh Chaddha’ chechhe chhunzawm zelin he film-a inlan dan chu Indian army hmuhsitna dik tak niin, Air Force Officer pakhat chuan a sawi.
Hollywood classic film lar, ‘Forrest Gump’ remaking a ni hrim hrim hi mi tam tak ei loh zawng tak a lo ni lehzel a, Aamir-a’n Punjabi awphawi dik lo taka a hmang te, maksa danglam taka inlan a tumna te hi tam tak chuan an kham deuh ta bawk nen, Indian army officer anga a inlanna ngat phei chu sipai lam a hmin lo chiang hle.
Air Commodore Kartikeya Kale (Rtd.) chuan dik lo leh fel lo takin Aamir Khan hian army officer lem a chang nia sawiin, “He film a siam hma hian engnge a ngaihtuah ka hre lo. A phenah hian agenda eng emaw chu a awm ngei ang. Army officer nihphung leh kalphung a hmu fuh lo nge ni ka hre lo bawk.
“Army officer nen minute nga vel lek pawh thu dun ta se, tuna a lan dan hi Indian army sipai awmdan tur a nih lohzia a hmu chiang ngawt ang.
“Rilru lama chiang zan lo mi pakhat sipaiah a lut a, indonna muala a zuanglut ta mai bawk a, hei hi thil fel lo leh dik lo tak tarlanna a ni.
“Sipai chu a viak a tha in, rilru lamah pawh fel lohna a nei tur a ni lova, rilru lamah harsatna a nei lo tih finfiah a nih hnu ah chuan silai leh ralthuam dangte a kutah pek a ni thin. Indian army-a sipai te hi taksa leh rilru lamah pawh an fit tawk a ni,” tiin Pyara Hindustan nena interview an neihah a sawi.
A tawp kharnaah, “A film siam hi Indian army hmuhsitna nasa tak a ni,” a ti.
‘Laal Singh Chaddha’ film-ah hian Aamir Khan, Kareena Kapoor Khan, M Ona Singh leh Naga Chaitanya te an inlan a, August 11 khan tlangzarh niin, ni 10 a liam hnu-ah cheng vaibelchhe 51.60 vel a hmuchhuak awrh chauh a, box office-ah a flop chiang hle a ni.