Manchester United head coach Michael Carrick hmakhua a thim tawh hle a, a aiawhtu tur tha tak an ngaihtuah tan niin thu a thang mek.
Champions League-a Como laka an mualpho hnuah Carrick sawiselna leh rintawk lohna thawm a ri nasa zual a. Pathianni zana Bournmouth laka Old Trafford-a si thum faia an tlawm leh hnuah phei chuan bân ngei ngei tura ngaih a ni ta.
A chet chhiatpuina hian club thuneitute leh tantute inkar boruak chhia pawh an chawk tho thar leh niin an sawi ta. 2014-15 hnu lama bul an tan chhiat ber a ni a, sum pawh an hloh hnem hle a ni.
Carrick an bân dawn a nih chuan a hmun ruak luah tur hi club thuneitute chuan an ngaihtuah tan tawh a. Eddie Howe, Julian Nagelsmann leh Antonio Conte te hming a ri ring ber a ni.
Head coach bân chungchang hi Sir Jim Ratcliffe, Jason Wilcox leh Michael Sansoni te ngaihdanah a innghat lian ber dawn a ni.
Club chuan Old Trafford-a lak luh atan Howe an duh ber niin thawm a awm a. Newcastle United manager hlui hi buaina karah chhuak mah se Magpies a lo enkawl tawh dan atangin club dinhmun harsa taka ding mek kaih thawh dan a thiam hle tura ngaih a ni.
Erik ten Hag a chhuah hnuah khan sporting director Dan Ashworth-a chuan Howe hi lak luh a lo rawt daih tawh a; mahse, Ratcliffe-a’n Ruben Amorim-a lak chhuah theihna zat sum pek a thlang ta zawk a. He thutlukna an siam hnu thla khat velah Ashworth-a pawh a chhuah phah ta a ni.
Brighton manager Fabian Hurzeler leh Nagelsmann te pawh an langsar hle a, Hurzeler erawh a hming a rik rualin a inhnukdawk nghal thung.
Conte chu Manchester United tan a inhawng hle a, an ruai a nih chuan dressing room leh player lakna kawnga a duh dan tur te a duang sa ve thung.
Sir Alex Ferguson chawlh hnuah United hian manager an thlak nasa tawh hle a. Kumin January thlaah khan Amorim-a hnuaia hma an sawn theih loh avangin Carrick chu a lailawk atan lak luh a ni a. Red Devils hi a chet thatpui nghal hle a, Arsenal leh Manchester City te chu a zawnin an hneh a, season tawpah club chu pathumnaah a awmpui thei hial a ni.
Nipui bazar inhawn chhungin sum hman tur an nei tlem hle a, 2026/27 season chu beisena sang taka an hmachhawn laiin an tum angin bul an tan tha thei ta lo a. Vawi 11 an inkhelh tawh atangin vawi hnih chiah an la chak a, Premier League-a Ipswich an hneh leh Champions League-a Sabah an hneh te kha a ni.
An midfielder hlui hi bân a ni a nih chuan kum 2012-13 Premier League nomawi lakpuitu, Sir Alex-a a chawlh hnua manager 11 an bânna a ni tawh ang.