Central Bureau of Investigation (CBI) chuan nimin khan BJP MLA Lourembam Rameshwor leh mi dang palite chu Manipur University (MU) campus, Imphal International Guest House-a hman tur in chhung bungrua (furniture) supply-a pawisa tihchingpen thuah an inrawlh ngei a ni tih tihlanna an thehlut.
University-a bungraw supply chhia hi kum 2012-2016 chhunga thleng a ni a, Special Judge (Prevention of Corruption Act), Imphal West district hnenah chargesheet hi thehluh a ni.
Rameshwor hi hetih lai hian M/S Lourembam Enterprises neitu niin BJP hmingin kum 2017 inthlanah khan Keirao bial, Imphal East atangin MLA atan thlan tlin an ni.
CBI hnuaia anti-corruption bureau, Imphal branch chuang thil tisuala an puh mi pangate hi IPC sections 120B, 420, 468, 471, 477A leh Prevention of Corruption Act 1988 Section 13(2) r/w 13(1) hmangin thubuai an siamsak.
Rameshwor baka mi dangte hi hetih hun laia MU finance officer K Jibankumar Singh, varsity-a store-incharge Ksh Bashanta, purchase officer leh mi mal company pakhata manager thin Ksh Joykumar te an ni.
Special court chuan he thubuai hi a bikin a ngaihtuah a, October 12-ah heng mi an puhte chungchang hi ngaihtuah turin a ti.