August 18, 2022 khan Zoramthari (Tebawihi) (35) w/o Isak Malsawmsanga, Hortoki chu Civil Hospital Aizawl (CHA)-ah nau a neih hmain a thi a, he thihna hi damdawi ina thawktute inthlahdah vanga thlengah an khuain an ngai.
Nau nei tura CHA-a admit, nau a hrin chhuah hmaa thihna thleng chungchangah hian August 21, 2022 zan khan Hortoki VC leh NGO-te chuan joint meeting an nei a, he thihna thleng hi damdawi in lama thawktute inthlahdah vangah ngaiin nurse duty an demna thute thuchhuah an siam.
He thihna thleng chungchanga Hortoki VC leh NGO-ten thuchhuah intawm an siamah chuan Tebawihi hi tun thla August 4, 2022 khan CHA-ah checkup turin an kal a, ultrasound-a an lo enin nau a la hlat thu leh tui a pai tlem thu an lo hrilh a, August 12, 2022-a kal leh tura an tih angin an kal leh a, hemi tum pawh hian nau a hlat thu an lo hrilh leh hnuin August 29, 2022-a kal leh turin an lo hawtir leh a ni.
Thuchhuaha tar lan a nih dan chuan hetia an inentir hnu hian Aizawlah an chamchilh a, August 17, 2022 zing dar 9 atanga a pum a nat tan avangin chhun dar 12-ah ACH hi an pan leh a, a pum na a zual zel avangin tlai dar 4-ah nurse-ten a dinhmun an enfiah hnuin nau nei tur a la nih loh thu an hrilh hnuah an kalsan leh ta niin an tar lang.
Tebawihi hian a pumna mangang chuan, “Min zai mai rawh u,” tiin a tawng chhuak hial niin thuchhuah intawm an siamah chuan an tar lang a, August 18, 2022 zing atang phei chuan a awmpuitu pawh an mangangin, nurse muhil lai a va kai tho a, “Nurse-te an kal pawhin engmah a ni thei ta chuang lo,” tiin, “Zing lam dar 6:30 khan a na tuar lovin a boral ta a ni,” an ti.
VC & All NGO thuchhuah chuan nurse-ten doctor-te rawn lova thuthlukna an siam maite chu mak tih thu te, hetih laia CHA-a nurse duty-te hi an dem takzet tih sawiin, hetiang hi thleng nawn tawh lo se an duh tih an tar lang bawk.
Hortoki atanga thudawn danin lusun chhungte hian ‘he thihna avanga thubuai thehluh hian a damtir leh theih dawn chuang lo’ tiin thubuaiah la duh lo mai an ni tih thudawnna chuan a sawi a, ‘an thinlung erawh a dam loin, an hrethiam lo hle a ni’ a ti.
Tebawihi ruang hi a thih ni, August 18 khan Hortoki-ah phurh thlak nghal niin, lumen a ni a; August 19, 2022 chhun dar 12 khan vui liam a ni.