Karbi hnam bil hel pawl chi hrang pangaa mi 1,040 zet chuan Thawhlehni zan khan an ralthuam tungin sorkar kutah an inpe a, Assam Chief Minister Himanta Biswa Sarma pawhin an inpekna hun hi a hmanpui.
Hel pawla tel inpete hi Karbi People’s Liberation Tiger (KPLT), People’s Democratic Council of Karbi Longri (PDCK), Karbi Longri N.C Hills Liberation Front (KLNLF), Kuki Liberation Front (KLF) leh United People’s Liberation Army (UPLA) mite niin PDCK-a an hotupaa inchhal, Ingti Kathar Songbijit pawl a tel.
Helte hian ralthuam hrang hrang 338 leh silaimu 11,203 an pe tel.
Chief Minister Sharma chuan thu sawiin hel inpete chu a lo lawm a, ram Danpui hnuaia awm tura an rilru an siam chu lawmawm a tih thu a sawi.
“Karbi Anglong hi kan state-a district mawi ber pawl a ni,” tiin chief minister chuan a sawi a. Hel inpe tharte chu mahni kea Assam din tuma a beihna kawngah Karbi Hills atanga tel ve turin a sawm nghal bawk.
“Karbi thalaite hian theihna an nei sang a, Karbi Anglong hi tihmasawna khualzin hipna lama theihna a neih hmanga tan la turin ka ngen cheu a ni,” a ti.
Sharma chuan sorkar hian nun pangngaia nung turin a lo dawngsawng satliah mai lo tih sawiin, an nun zelna turah a dwamin ei zawnna pawh siamsak a tum tih a sawi.
Chief minister hian Karbi Hills-a muanna a awm theih nana Karbi Anglong Autonomous Council thuneitute hmalakna a fak nasa hle bawk.