Aizawl : Education deptt-in thuchhuah siamin, Lungsen HS-a zirtirtu nghet dah ngiata school khar hial ngai pawi an tih thu an tarlang a. “Hmun hrang hranga zirtirtu indaihlohna nasa tak karah Lungsen HS-a indaihlohna pawh hriain sorkarin SEDP hnuaiah zirtirtu 3 (Science leh Mathematics zirtirtu telin) a dah belh” an ti.
Lungsen HS-ah zirlai 59 an awm thu leh zirtirtu 7 an awm thu thuchhuah chuan tarlangin, zirtirtu 7 zinga 2 chu regular teacher, 3 SEDP, 1 CSS teacher leh a dang 1 MLA fund a rawih a nih thu an tarlang a. “Hmundanga indaihlohna ngaihtuahin zirtirtu 7-in zirlai 59 chu tha taka zirtir thei tura beisei a ni” an ti bawk.
School education department thuchhuah chuan hei aia tam zawk zirtirtu dah chu tun dinhmunah a harsat rih thu tarlangin, Lungsen khawtlang mipuite chu hei hi hrethiama, zirna tha taka a kal theihna tura school khar zawnga hma la lova zirtirtu ten an theihna zawng zawnga zirtir hna an thawh theihna tura tawiawm turin an ngen tih an thuchhuahah chuan an tarlang bawk a ni.