Premier League club Leicester City chuan Chelsea atangin an defender Wesley Fofana a vawi thum nan a lei dilna an dawn chu an hnawl a. Foxes hian Pound maktaduai 60 leh 70 inkar vel nia sawi dilna hi an beisei ang a phak loh avangin an pawm lo.
Kum 21 mi lei dilnaah hian Chelsea in sum hlawm a pek tur bakah a khelhdan a zir a inpek belh theih dan turte an zam a. Mahse heng zinga thenkhat hi Leicester City chuan beiseiawm lova an ngaih avangin an pawm lo.
Foxes hian French defender chungchanga an dinna hi an la thlak lova, an player hi an hralh dawn a nih chuan khawvela defender manto ber nih tir an tum a. Pound maktaduai 80 aia tam an beisei.
Tun nipuiah Blues hian player lakluh nan Pound maktaduai 170 vel an hmang tawh a. Pound maktaduai 45 a Everton forward Anthony Gordon lei an tumna chu hnawl a ni tawh bawk.
Foxes hian kum 2020 a an lakluh France Under-21 defender hi March khan kum nga contract an ziahpui chauh avangin hralh tlawm an tum lo.