Zirlai pawlte hmalakna leh an hmathlir a fakawm leh thin
Tunkar Thawhlehni leh Nilaini khan MZP chuan Thu leh Hla Kutpui hmangin, ziakmite kawmna leh Book of the Year dawng tawhte chawimawina hun hmangin, lehkhabu zuartute tan inphona remchang an siamsak bawk a, hun hlawkthlak tak a nih thu kalkhawmte chuan an sawi hlawm.
Tun hma lamin MZP vek hian kan thu leh hlate a lo hauhsak a, vawn nun zel a nih theih nan Thu leh Hla Kutpuite, Hla Kutpui te an lo hmang tawh thin a, Essay leh Article inziahsiak mai bakah Lemziak hmanga inelna thlengin a lo buatsaih tawh thin. Hemi kawnga zirlai pawl hmalakna hi ropui tak a ni. A hlu hle bawk.
Thu leh Hla Kutpui an hman pawh hi chhimtu an thahnem hle a, kalkhawmte chuan hun rei zawk awh thei se an duh thu an sawi fur hlawm a ni. Hei aia rei zawk hman dan pawh hi an la ngaihtuah a tulin a rinawm ta hle bawk.
Zirlai pawlte, a bik takin tuna hruaitu ni mekte hian thuziah leh chhiar kawnga thahnem kan ngaih a tulzia hria a kawng hrang hranga intuaitharna an siam hi a lawmawm hle a, chin chhunzawm zel ni bawk se. Mipuite lamte pawhin kan zirlaite hmakhawthlir hre chungin theihtawpa thlawp chungin hun hlawkthlak tur dang pawh siam chho zel mawlh teh se.