Russian rocket-in rel station a fuhah mi 25 an thi niin Ukraine chuan a sawi a, hei hi Moscow-in an ram a rûn atanga thla ruk a tlin ni-ah chiah a ni.
Khawchhak lama Chaplyne khuaa rel hmun beihna nia sawia thi zingah hian a bul lirtheia chuangte pawh an tel niin thuneitute chuan an sawi a. Mipa naupang pahnih, kum ruk leh kum 11 mi an thi tel bawk niin an sawi.
President Volodymyr Zelensky chuan he beihna hi UN Security Council thutkhawm kal laklawh laiin a puang a. Mi 31-in hliam an tuar bawk.
Russia chuan he thil thlengah hian engmah a la sawi lo.
A hma atang tawhin Moscow hian civil mite hmun beia puhna hi an pha zel a. Ningani khan UN Human Rights Commissioner Michelle Bachelet chuan Russian president chuan sipai chakna hmanga Ukraine a beih chu a tihtawp vat a ngaih thu a sawi.
Zelensky chuan Dnipropetrovsk region-a Chaplyne khaw beihna hi a hriat tawh thu leh Security Council biak a tum mek tih a sawi a, “Hei hi UN Security Council thutkhawm atana Russia inbuatsaihna a ni,” a ti.
“Passenger chuanna pindan pali a kang mek a, thi hi an la pung thei,” a ti.
April thla khan rel station dang pawh beih tawh niin mi 50 chuang an thi.
Ukraine hian Nilaini khan an indan champha an lawm a, Zelensky hian a hmain Russia-in an lawmna tihbuai tumna an neih theih thu a sawi lawk.
A hmain Moscow sipaite chuan Zaporizhzhia nuclear plant chu ‘indona hmun;-a chhuah an tum tia sawiin, he plant-a inbeihna a thlen chuan Europe mipui a tiderthawng thei dawn a, khawvel pum pawh radiation avanga chhiatna nasa tak tawng thei a nih thu a sawi bawk.
UN Secretary General chuan an thutkhawmnaah hian ‘ngaihtuah chiang lova indona’ chuan Ukraine leh a bakah pawh mi maktaduai tel rethei bakberhin a siam tih a sawi.
Tun kar tirah khan Ukrainian thuneitute chuan an sipai thi zat a vawi khat nan a puang a, thla ruk vel an buai tawhah sipai 9,000 vel an chân tawh niin an insawi.
Inchân nasa hle tawh mah se Ukrainian hruaitu chuan an ram mipuite hnena thuchah a sawiah an ram pum chu a vaiin an la kir leh dawn tih a sawi.
“Heng thu, ‘Missile hmangin February 24-ah an tichhia,’ tih hi kan hre ve lo,” a ti.
“Hmelmate hian pangngar leh champagne nen chibai kan lo buk turah an ngai a; mahse, pangpar kual (mitthi pangpar) leh Molotov cocktail an dawng zawk ang,” a ti.