South Korea chu khawvela nau piang tlemna ber ram a nih chhunzawm leh a, tun tumah phei chuan a hniam ber tum a tawng.
Kum 2018 khan a vawi khat nan hmeichhe pakhatin nau pakhat pawh an hring tling lo.
Nilainia sorkarin an dinhmun a tihchhuah thar lehah phei chuan hmeichhe pakhatin nau 0.81 chauh hring ang a ni a, a hma aiin point thumin a hniam zawk a, kum ruk chhung a zawnin a hniam zawng zelin an kal.
Khawvela anmahni anga ram changkang ramte dinhmun chawhrual chu hmeichhe pakhatin nau 1.6 zel hring ang an ni thung.
Ram changkangte hian tuna an ram theuhva mihring awm zat ang ni zel tur chuan hmeichhe pakhatin naute pahnih, 2.1 zel tal an hrin a ngai a, hei pawh hi tumah an ram chhuahsana pem an awm loh chuan tih chauh a ni.
Organisation for Economic Co-operation & Development (OECD) chuan khawvel pumah kum 60 liam ta atang khan ‘nasa takin’ nau piang zat hi a tlahniam tih an sawi.
Hetih lai hian South Korea-ah tlakhniamna hi tun hnai chhuan tlem te-ah hian a nasa zual a. Kum 1970 vel thleng kha chuan nu pakhatin fa pali zel hring ang an la ni.
Mihring pung chak lo hian ram eibar dinhmun nasa takin a nghawng thei a. A langsar berah chuan healthcare system leh pension-a sum sen nasa takin a tipung dawn a; hei bakah hian thalai hnathawk rual an tlem zel chuan ram sum leh pai dinhmun a khawih lo thei lo.
Kum 2020 khan South Korea-ah hian hlauhthawnna nasa tak a lo awm tawh a, hemi kum hian a vawi khat nan nau piang aiin mihring thi an tam zawk a ni.
Tun hnai kum eng emaw ti chhung hian miin sum dinhmun an thlir nasat avang leh an eizawnnaah an insawrbing nasat avangin fa neih duah lo turin thutlukna an siam nasa niin mi thiamte chuan an sawi.
Kum 2021 khan mi thiamte chuan khawsakna man sang zel, in man to leh Covid hripui khan mi tam tak chu fa neih tlem lam rilru a puttir nasa niin an sawi bawk.