Mizoram Pradesh Congress Committee (MPCC) President Lalsawta chuan Mizoram mamawh ber chu system tha a nih thu a sawi.
Ningania Dinthar YMA Hall-a Aizawl West II Special Block Conference a hmanpuinaah Lalsawta chuan Mizoram mamawh ber chu system tha a nih thu sawiin, “Mizoram hi taima leh rinawmte dinchhuahna ramah kan siam thei a, system tha kan mamawh ber chu a ni,” a ti.
Pathian leh mipui laka politician-te mawhphurhna chu ram rorelna tha siam a ni tih sawiin Congress president hian, “Pathianin hnam tin ram leh mipui min pe a, chung thil pahnih enkawla hmang tangkai (manage) thiam apiang chuan ram nuam leh ram hmasawn an siam thin,” a ti a; Mizoram dinhmun chhe taka ding mek siam thaa tungding turin ram chhunga ei rukna leh sum um atchilhna hi tihboa an rawngbawlsak mipuite la retheihzia hriaa retheih leh hah huamten hma la turin Congress hruaituten an inhuam a ngaih thu a sawi.
Lalsawta hian mipuiten eizawnna nghet an neih theih nan cooperative society leh micro, small & medium enterprises (MSME) te nasa taka uara thlai thar zawhna leh sawngbawlna rintlak buatsaih a ngaih thu a sawi a. Ram mipui hi chuan politics-a inchirh theh leh inpuhna chhe pui pui hi hawisana an hnathawha an bur ngar ngar hi an duh tih sawiin, hmasawnna leh eizawnna ngelnghet neihna turah ngaihtuah ngai pawimawh pahnih, environment humhalh, taimate leh rinawmte hlawhtlinna ramah Zoram siam a ngai a, ram rorelna tha nei tur chuan sorkarin thuneihna insemzai hi a tihpuitlin a pawimawh thu a sawi bawk.
Nimin vek khan College Vengah Aizawl South-I Congress Special Block Conference neih a ni bawk a, MPCC Gen Secretary John Siamkunga leh Aizawl District Congress Committee hruaituten an hmanpui bawk.