An duh thu reng avanga Mizoram chhuahsana Tripura-a inbengbel ta Tuikuk mi thahnem tak chu Tripura electoral roll-ah thun an ni tawh a, Mizoram electoral roll atanga an hming thai chhiat pawh mi 1,336 an tling tawh.
Tar lan tawh thin angin Tripura relief camp-a awm Tuikukte chu Tripura-a awm hlen turin January 16, 2022 khan sorkar laipui aiawh, Mizoram leh Tripura sorkar aiawhten inremna an ziak.
Tripura-a awm nghet tura tih an nih hnu hian a tahtawlin an hming chu Mizoram roll atanga paih an ni ta a. Tun thlenga roll atanga paih tawh chu mi 1,336 an tling tawh a ni.
Election department atanga thu dawn danin Mamit district-a vote nei mi 1,134-te hming thai chhiat a ni tawh a, Kolasib district-a vote nei mi 187, Lunglei district-a vote nei mi 15-te hming thai chhiat a ni tawh.
Tuikukte hi Tripura sorkar chuan an inbengbel reng em tih a endik a, pawmtlaka a ngaih, roll-a thun dilte chu thun an ni a, chu mite chu Mizoram sorkar hriattir an ni a, an hming paih an ni ta a ni.
Tripura-a Tuikuk an pem tan kum chu 1997 kha a ni a, hemi kum September 23 leh 24-a Saipuilui khuaa Bru National Union (BNU) inkhawmpuia Bru hnam puala autonomous district council hran an ngiat a, BNU thil ngiat hi khawthlang lama awm Mizote chuan an dodal nghal a; boruak inmun mek lai, October 21-a Bru hel pawl mite’n Dampa Tiger Reserve vengtu Forest Guard Lalzawmliana an kah hlum avang khan boruak a chhe leh zual ta a, Bru chhungkaw tam tak chu Tripura-ah an pem thla.
November 16, 2019 atanga hruai kir tura ruahmanna siam a nih laiin a hma ni thum, November 13-a Bru hel hoten Bungthuam rawlthar, Zarzokima an kah hlum leh tak avangin hruai kir hna hi thulh a ni ta a. Mi eng emaw zat chu Tripura-ah an pem belh a. Vawi tam tak hruai kir tura ruahmanna siam a ni a, eng emaw zat an kir chungin a tam zawk chu kir duh lo.
Tuikuk buaina hi kum 2020 khan chin fel a ni ta a, January 16, 2022 khan Tripura-a an awm hlenna turin inremna ziah a ni ta a. Inremna hi khatihlaia Union Home Minister Amit Shah kaihhruaina hnuaiah ziah a ni a, Mizoram sorkar aiawhin khatihlaia Chief Secretary Lalnunmawia Chuaungo-in hming a ziak a ni.