Khawpuiah mihring an pun angin veng tinin a kum telin mitthi an ngah a, veng thenkhatin an thlanmual hman lai chu daihzai zawka hman dan an ngaihtuah zel a; Aizawla Zotlang Branch YMA pawhin thlan khur khata mi thahnem tak phum theihna tur RCC thlanmual an siam.
An thlanmual hman lai chu rei zawk an hman theihna turin ram awl an la neihah RCC thlanmual khur 18 awm an buatsaih a, thlan khur khat hi fit kuaa thuk, inches 27-a zau a ni.
Recycle system-a hman theih tur RCC thlanmual siam an rel tluk tirh hian sum neih sa an nei lo tih Zotlang Branch YMA President PB Lallawmzuala chuan The Zozam Times hrilhin, “Veng chhungah thlanmual siam nan sum kan khawn a, sum bakah cement leh hmanraw dangte pawh kan dawng nual mai,” a ti.
RCC thlanmual siam nan hian a sum faiin Rs nuai 7 an seng a, hmanraw dang an dawn hlut zawngte nen chuan Rs nuai 10 vel an sen tawh thu sawiin, thlanmual pan thlakna tur siamna Rs 3,50,000 chu an ward councillor hnen atangin an dawng tih a sawi.
Tuna thlanmual an siam chin hi an la duh tawk dawn lo tih YMA president chuan sawiin, “Khur 18 hi kan siam phawt a, kan la zawm zel dawn a, rei tak kan hman theih pawh kan beisei,” a ti.
Zotlang Branch YMA hian RCC thlanmual hman dan tur duangin thlan khurte chu chhungkaw khat inphum nan ‘Thlan ro’ atan hman theih a ni dawn.
‘Thlan ro’ atana hmang duhte erawhin an chhungte boral tawh thlan khur hlui pathum tal chu tiruakin thlan khur tharah chuan an phum a ngai thung dawn a, ‘Thlan ro’-a phum tur chu thlan khur hluia phum atanga kum nga tling tawhte a ni tur a ni thung a, an duh zat zat thlan khurah chuan an chhungkhat an phum thei tawh dawn a ni.
YMA president chuan thlanmual chhawng khatna an zawh hnu August 20, 2022 khan a vawi khatna atan thlan khur pakhatah chhungkaw khata mi ruang panga an phum tawh thu a sawi a, “Thlan khur hluia mi kan la chhuak a, ruhrote chu kan phum khawm a, hei hi ‘Thlan ro’ atan an nei ang a, an duh zat zat an inphum thei dawn,” a ti.