MPCC Vice President Lal Thanzara chuan MNF sorkar chu SEDP-ah cheng nuai thum sem tura an intiamna an tihniam leh chu mipui hmuhsit vang a ni tih a sawi.
East Tuipui bial fanga khaw hrang hrang a tlawhnaah thu sawiin Lal Thanzara hian, MNF hian an sorkar chuan SEDP-ah nuai thum theuh pe tura an intiam avangin mipuiin sorkarna an kutah an pe a. Mahse, cheng nuai thum atanga Rs 25,000 ah tihniam leh chu an intiam anga an sem theih dawn loh avangin mipui beidawng lutuk tuamdam an tumna nia sawiin, “Mipuite hi min hmusit hle a ni,” a ti.
Lal Thanzara hian Mizorama sorkar hnathawkte zingah hian mi fel, hlemhletna leh eiruk duh lo, thahnemngai taka hnathawk thin tam tak awmte hi tun dinhmunah an beidawng avangin ei ruk laka fihlim chief minister neih an duh a. Chutiang mi chu Congress President Lalsawta a nih thu a sawi bawk.