Sports Minister Robert Romawia Royte-in Lawngtlai East (Tuichhak) lamah ‘operation Mualzavata’ tih hmingpuin football field leh infiamna hmunhma engemawzat siam beihpui thlak tum a nih thu a sawi.
India zalen champha Independence Day kumina Lawngtlaia lawmna a hmanpui hnu a Mampui khuaa Lawngtlai district sports complex sakna tur lungphum a phumnaah he thu hi Sports Minister chuan a sawi a. Infiamna hmunhma ṭha awmlohnaah hmu- nhma ṭha buatsaih tura sorkarin ruahmanna lian tak tak a kalpui thu sawiin, Lawngtlai district chu Sports complex lian leh changtlung tak nei hmasa pawl an nih tur thu a sawi.
Sports Minister chuan Lawngtlai district sports complex sakna atan sorkar lai- puia Ministry of minority affairs hnuaia Pradhan Mantri jan vikas karyakram (PM- JVK) aṭangin Rs nuai 5,019.43 pawmpuina hmuh a nih tawh thu a sawi a. Rs nuai 5,019.43 atanga za-a 90, Rs nuai 4,517.49 chu central sorkar tum tur a nih thu leh state sorkarin za-a 10 Rs nuai 501.94 a tum ve tur thu a sawi bawk.
Lawngtlai district sports complex hi Lawngtlai aṭanga km 20 vela hlaa Mampui khaw bulah din tura ruahman a ni a. A sakna tur sum 1st instalment Rs nuai 2,258.74 dawn a nih tawh thu leh hna thawk tura M/s Decor India, Guwahati te thlan an nih tawh thu Sports Minister chuan a sawi.
Sports Minister chuan Lawngtlai district ṭhalaite hmasawnna tur hna hrang hrang zingah Lawngtlai Vengpuia Astro turf football ground siam hna ṭan a nih tawh thu sawiin, a dang pawh thawh chhoh zel a nih tur thu a sawi a. CYLA playground-a mipui ṭhutna gallery chung khuh siam dan tur pawh ngaihtuah mek a nih thu a sawi bawk a ni.