Australian racing driver Daniel Ricciardo chuan British Formula One team McLaren F1 Team chu tun season tawpah a chhuahsan dawn.
He team hian an driver nen an thawhdunna titawp turin inremna an nei tih an sawi a, hetihrual hian contract titawp hma tura hma latu an nih thu an pha lo.
Hetiang a nih avang hian McLaren chuan Australian mi tho Formula 2 champion ni lai leh BWT Alpine F1 Team reserve driver ni mek Oscar Piastri chu an lalut dawn nia chiang angah mi tam takin an ngai tawh a. McLaren hian kum 2023 season a an driver turte tihchian thuai a nih tur thu an sawi tel.
Chiang zawkin
McLaren-ah hian Ricciardo hian nakkum thleng contract a la nei a. Nimahsela F1 intlansiak a tum 8 pakhatna ni thei hi an hnena hun a hman chhungin beisei anga a chetthat loh avangin chhuahtir an thlang a. A thlaktu tur driver beiseiawm duhthlan tur an neihlaia chet an thlang.
Ricciardo hian season liamta khan Italian Grand Prix-ah pakhatna hauh mahse a pumpui a season thlirin nikumah pawh a teammate Lando Norris chu a pha lo thin a. Tun season-ah pawh qualifying-ah chawhrualin second 0.356 a tlan muang zawk ang a ni a. Hei hi F1 tehna atang chuan inthlau tak a ni.
McLaren team principal Andreas Seidl chuan, “Tunhnai thla 18 thlir kirin Monza-ah hun ropui tak tawng mah ila Daniel nena McLaren zinkawng hi kan beisei ang a ni lo tih a chiang.”
“Hei vang hian sawihona leh inbiakna pawh a tam a, a tha tawk lo a ni tih kan pawm tlang. Daniel-a lam atangin contract a nihna anga hman zawh tumna leh inpekna pumhlum awm mahse inrem dan tur kan zawng ta zawk a ni.” a ti.
Kum 33 mi Ricciardio hi kum 2011 British Grand Prix atangin F1-ah a intlansiak tan a. Intlansiak vawi 223 a tlan tawhin hnehna vawi 8 a chan tawh bakah dawhsanah vawi 32 a lawn tawh a. Qualifying-ah vawi thum pakhatna a ni tawh.
“Bung thar ka kai tur chu engpawh nise thil thleng tawh leh kaldanah inchhirna ka nei lova, McLaren a ka hnathawhah ka lungawi.” tiin a sawi ve bawk.