Indian National Congress hruaitu hlun, an thluak bur zinga mi, Ghulam Nabi Azad chuan Zirtawpni khan party-a a nihna zawng zawng bansanin party a chhuahsan.
Azad-a hian a bânna lehkhaah Rahul Gandhi chu na taka beiin puitlin lo leh naupang chhia ang mai a nih thu a sawi a, an party-a inrawna thiltih thin ang tichhe vektu a nih thu a sawi bawk.
Party president hnena insiam that a ngaihzia leh a tulna hrang hrangte thlentu mi 23, G23 an tih mai zinga an khaipa, Azad-a hian Gandhi-a party president a nih chiah khan hruaitu hlun dangte chu an kiang vek niin a sawi a, ‘amah tlawntu inkawm hrang bikten party an hruai’ ta niin a sawi.
Party President Sonia Gandhi hnena bânna lehkha a thehluhah hian Gandhi-i chu a fak a, kum 2017 leh 2019 inkara an party chief, a fapa Gandhi-a erawh nasa takin a sawisel a ni.
Gandhi-a chu Congress kaihhruai UPA sorkar laia union cabinet-in ordinance hmanga dan an pawm ang mai khan ‘a puitling lo tak zet’ tih a sawi.
“A naupan chhiatna hian prime minister leh India sorkar thuneihna pawh a tikhawlo va. Hei mai a ni lo va, UPA sorkar paih thlak a nih tak chhan pawh kha amah vang hi a ni,” a ti.
Inthlana an chak theih loh chhan tam tak a ziah zingah pawla inrelbawlna fuh lo chu a lian tih a sawi a, “Thil dang bakah hian Indian National Congress hian a tum a hloh va, inkawm bikten AICC an hruai khan a tichhia. Bharat Jodo Yatra tan a nih hma khan Congress hruaituten ram pumah Congress jodo yatra an nei hmasa tur a ni,” a ti.
Azad-a hian kum 50 zet a lo tel tawhna leh inkungkaihna thuk tak a lo neihpui tawh Congress-a a nihna zawng zawng, member a nihna thlenga a kalsan tak thu a lehkhaah hian a ziak a ni.
Thutlukna tihhlawhtlin loh tam tak a awm tih pawh a tar lang a, kum 2019-a Gandhi-a party president atanga a bâng pawh ‘thinbutut’ thiltih mai a nih thu a sawi a, “A pawi ber erawh remote-control ang maia UPA sorkara inpumkhatna tihchhiat hnua tuna INC-a chutiang bawk a kalpui leh hi a ni,” a ti.