- Reuben Lalnunthara Hnamte
Tunlai khawvelah mi ka buai a, thingtlang lamah nitinlo hnathawkin emaw, huanah emaw nu leh pa kan feh te a lo ngai a.Khawpui lamah pawh nu leh pa hnathawka chhuak a fa te awplum hman lo kan tam hle mai. Hei hi kan duh vang reng nilova khawvel changkannain a thlen pawh a ni thei a. Chutih rual erawh chuan kan fate tana hun kan neilo lutuk hian kan fate nun a tichhia em tih hi zawhna pawimawh tak a ni ta. Mizoramah pawh tunhnaiah ruihhlo a lar em em lehzual ta a, naupang kum tlinglo chenin an fihlim ta lo ni tein a lang ta a ni. Hetiang zela kan ram hi a kalchho a nih chuan kan hmabak chu a duhawm lo hle ang.
Tlangval pakhat thubuai nei chuan roreltu hmaah tihian a sawi a”Kapa hnenah chuan ka harsatnate, tanpui ka ngaihnate ka thlen thin a. Kapa chuan ka buai em mai hun ka neilo” tiin min chhang thin” a ti a ni. Chu chuan chu tlangval chu sual lamah hruailutin a nun chu bawraw takin ruihhlo nen a lo hmang ta a, thubuai rip tak a awrh phah ta a ni. Nula tlangval tam tak, nu leh pa nei si, chhungkaw awmzia hrelo an tam hle mai. Kan fate thiamna leh changkanna duhin phai lamah te an naupan lai atangin kan thawn a, school kan luhtir a, tha taka lo chhuak an awm laiin, tam tak chuan an nun an hloh a, chhungkaw awmzia pawh hre lovin, Pathian awm ringlo hialah te pawh an chhuak a ni.
Fate tana kan pek theih hluber chu sum te, incheina leh eitur emaw, rohlu emaw nilovin “ kan hun kan pek hi a ni. Naupang hian nu leh pa angchhunga awm tluka an himna hi a awm lo. Nu leh pa hnathawka kan chhuah angaih thin avangin naupangte chu midangin an lo enkawl a, enkawltu tha tak an nih loh phei chuan enge an zir chhuah ang? Lalpa laka kan rochan a lawmman min pek hlu tak hi tha taka enkawl hi Pathian laka kan mawhphurhna a ni . Khawvelah hian politics emaw, kohhran leh khawtlangte bul lotanna chu chhungkua a nih tlat avangin, chhungkaw tha leh nuam kan siam hi kan tih makmawh a ni.
Kan faten kan chhungkua nuam an tih lova, an himlo a nih chuan khawihahnge an kal ang? Enge an hmabak ni ta ang? Tunlaia thalai tam tak khawlaia riak mai mai leh, mahni chhungkua pawha haw ngam tawh lo hi tam tak an awm a ni. Lockdown laite khan chhungkaw tam tak chuan inpumkhatna an neih phah hial a nih kha. Kan fate hi kan chhungkuaah him se la, nuam ti rawh se. Kan fate chu thianah kan siam a, an harsatnate, tanpui an ngaihnaahte kan tanpui a, an aw kan ngaihthlak hi a pawimawh takzet mai. Thalai mahni intihlum te hi an va tam ta em? tu mawh nge ni ang?
Nupa inthnenna tam lutukte hi ngaimawh tham a ni tawh. Ropui tak leh senso hautak thei ang ber te in kan innei a, reiloteah hote in kan inthen leh a. Naupangte enkawltu mumal nei lovin an lo seiliana, chu chuan nun beidawnnaah a hruai a; kal ngaihna hre lovin mahni intihhlum mai duhnate, sual kawng thui tak zawh duhnate an lo neih phah thin. Hei hian kan ram chu nauchhiatna ramah min hruailut mek a ni. Tunlaiah HIV natnate a pung nasa em em mai a, ruihhlo a hluar lehzual bawk. Kan ram mipui tlemte hi kan ral mai ang tih hlauhawm khawpin chhiatna hian min hmuak mek a ni. Campingte, crusade te kan han ti leh ngawt thin a, a sawt viau bawk laiin, a bilha tho lo chu siamthat hi a har tawh hle.
Nu leh pa tam tak hian kan fate aw hi kan ngaithla duh lova, an harsatnate, tanpui an ngaihnate ngaihthahin kan hnaah kan buai a, kan fate nun chu boralna lamah a hruai thin. Kohhrana inhmante, khawtlanga inhmante leh hnathawhte pawh a tha e. Chutih rual erawh chuan kan fate tana hun kan insiam a, an aw kan ngaihthlak thin a pawimawh hle mai. Kan faten an harsatna an sawi ngamloh khawp a fate pawh theihloh nu leh pa kan ni em? tih te hi inenlet nan kan hman a tul hle a ni. Kan ro hluber chu in leh lo emaw, sum leh pai leh bungrua a ni lova, kan fate hi kan ro hlu ber an ni. A pawimawh ber chu nu leh pate hian chhungkaw nuam leh tha siam a, chhungkuaa Pathian a Lalber hi a ni.