Manchester United head coach Michael Carrick-a chuan intihsiakna hrang hranga an chet chhiat deuh hnu pawhin an club chu dinhmun tha takah an awm tlat niin a sawi.
Season hmasa lamah khan Carrick-a kaihhhruaina hnuaiah Red Devils hian hlawhtlinna lian tak an hmu a, Premier League-ah pathumna niin Champions League khel turin an tling thei a ni.
Tun season-ah erawh fan te, Carrick-a leh board lam pawhin an suangtuah angin thil a awm lo hle a. An beisei angin an chak thei meuh lo va, an dinhmun siam tha turin an midfielder hlui rin zawh lohna a lian chho tial tial a ni.
Season hman mekah Manchester United chu Premier League inkhel vawi khatah chiah an la chak a, point 21 hmuh theihnaah point 7 chiah neiin 13-naah an awm mek.
Champions League-ah Atletico Madrid lakah 0-2-in an tlawm a, hei vang hian Red Devils chuan sawisel an hlawh zual a. Chu mi rual chuan inkhelh zawha an kawmnaah defender Lisandro Martinez-a chuan club thuneitute a sawisel bawk a, an club chhung buaina a zual tulh tulh a ni.
Carrick-a chu a dinhmun a derthawng tan mek niin sawi a awm tan bawk a, club thuneitute hian an thlak duh a nih chuan Chelsea leh Tottenham boss hlui, Antonio Conte chu Old Trafford-a lawm luh an hreh lo tih thawm a awm mek bawk.
Club dinhmun chungchang an zawhnaah Carrick-a chuan, “Mi tam takin thu hrang hrang an sawi a. Player hlui an ni emaw, an ni lo emaw, chu chuan heta thil thlen dan an hrethiam tihna a ni kher lo,” a ti.
“Player-te hian min ring tawk hlawm hle a. Pawn lam mi thil sawi ho hi thu dik a ni kher lo. Thu dik chu ka hrilh ang che u. Kan squad hi chu dinhmun tha takah an ding a, tun hnaia ka hmuh tawhah chuan a la tha ber ang. Chu chu a ni mai, a fiahin a chiang sa. Ni tinin kan awm ho avangin kan dinhmun dik tak chu kan hria a ni,” a ti bawk.
A sawi zelnaah, “He tiang thu thang vel hian min tibuai miah lo. Dinhmun tha takah kan ding a, kan player-te chungah hian ka lawm tak zet a ni,” a ti.