Madhya Pradesh chu India rama kum upate tana state him lo ber a nih thu National Crime Record Bureau (NCRB) ‘Crimes in India’- 2021 report-ah tar lan a ni.
Chhattisgarh chuan pahnihna dinhmun hauhvin Himachal Pradesh-in a dawt.
Data-ah hian kum upa (kum 60 leh a chung lam) laka pawikhawihna thubuai zat bi chu Madhya Pradesh-ah hian 92.3 a ni a, Chhattisgarh-ah 70 a ni ve thung.
Himachal Pradesh-ah 59.6 niin ram pumah 25.1 a nih laiin heng state thumah hian a sang hle.
Thubuai awm zat bi hi mi nuai khat zela thleng zat ziah luh tihna a ni.
Delhi chu union territory zinga kum upate laka pawikhawihna a thlen tamna ber niin nuai khat zelah 101.7 a thleng a. Anni hi state leh UT zawng zawngah pawh a san berna a ni.
Himachal Pradesh-ah hian kum 60 chin chung lam mi nuai sarih vel an nei a, an state mipui zinga 10.2% vel an ni a, kum 2011 chhiarpui atanga chhut chuan kum upa ngah ber niin India ram pumah 8.6% chauh an awm a ni.
Tlangram state-ah hian kum 2021 chhung khan upate lakah pawikhawihna thlengah thubuai 419 ziah luh a ni a, kum 2019-a 166 awm zat atangin 152% zetin a pung a. Kum 2020 khan 394 thleng bawkin heta tang hian 6.3%-in a pung ve thung.
Himachal Pradesh thenawm, Uttarakhand chu upate tana him ber a ni ve thung a, mi nuai khat zelah thubuai 0.8 chauh ziah luh a ni.
An thenawm thova mi, Punjab-ah 11.7 leh Haryana-ah 48.1 a ni a, Ladakh huam telin Jammu & Kashmir-ah 4.4 a ni thung.
Himachal Pradesh-ah hian kum upa thah pawh an awm nual a, pawngsual thubuai pahnih a awm a, thah tumna pali, hliam tenau 67, inhliam na 29 a awm bawk.
Kum 2021 chhung khan India ramah upate laka pawikhawih avangin mi 341 man an ni a, heng zinga 263 chu mipa niin hmeichhia 78 an awm bawk.
Kum 2021 chhung hian upate laka dan bawhchhia thubuai siamsak zinga thiam loh chantir mi pali chiah an awm thung a, thubuai zinga 5.1% chauh a ni.