Reliance Industries Ltd hnauia mi, Jio chuan thla hnih lo awm leh turah ‘khawvela a hmangtu zat atanga teha 5G service lian ber’ tur chu khawpui lian (metro city)-ah an pe chhuak tan dawn niin company chairman Mukesh Ambani chuan Thawhtannia RIL 45th AGM-ah a sawi.
“Jio 5G hi khawvela lian ber leh 5G network tha ber tur a ni dawn a. Jio hian 5G version thar ber a pe chhuak dawn a, standalone 5G tih a ni a, kan 4G network-a pakhat mah innghat lo tur a ni,” tiin Ambani chuan a sawi.
Ambani chuan Jio 5G services hian mi tin, khawi lai hmuna mi pawh a tha ber leh rintlak takin a thlun zawm dawn tih a sawi a. “India hi China leh US chungah data hmanga chawm economy-ah dah kan tum a ni,” a ti.
India-a telecom company lian ber hian 5G service atan hian Rs. Vaibelchhe nuai 2 zet a thap tih Ambani chuan an company-in annual general meeting an neihah a sawi a. Devember, 2023-a India pum tuam a nih hmain khawpui lian zualah 5G hi pek tan phawt a nih tur thu a sawi.
Tun thla tirah khan Jio hi India-a 5G spectrum lilamah inseng hnem ber niin $ tluklehdingawn 19 a seng a, $ tluklehdingawn 11-in a pe chhuak ang.
Sorkar laipui chuan 4G aia a let 10 chuanga chak tur nia sawi, 5G hi October thlaa pek chhuah hman an tum tih an lo sawi tawh a. Khawvel ram changkangah chuan network chhuan thar hi technology thang mek zelah tangkai taka hman ni tawhin mahnia inkhalh thei lirthei leh artificial intelligence hrang hrangah hman a ni tawh.