Gibraltar-a chengte chuan ‘khawpui mi’ tiin an insawi ve thei dawn ta a; mahse, he khawpui hi kum 180 kal taah daih tawh khan Queen Victoria chuan khawpui (city) tiin a lo puang tawh a, hei hi tu hriat mah hlawh lova awmin tunah chuan a ni ve tak tak dawn ta a ni.
British-hovin ram danga an awp zinga mi hi kumin kumtir khan Queen Platinum Jubilee puala khawpui nih dil eng emaw zat zingah an tel.
Zirbingtuten National Archives-a thil chhinchhiahte behchhana a chanchin an han zirchian chuan kum 1842 daih tawhah khan khawpui nihna hi pek an lo ni daih tawh si a ni.
Lung khawkrawk mawi danglam tak tak a tam avanga ‘The Rock’ tia an sawi thin bawkin khawpui nihna a nei ta chu Prime Minister Boris Johnson-a pawhin a lawmpui thu a sawi.
Gibraltar hi km 1713 atang tawha British-in an awp a ni a, War of the Spanish Succession tawpa inremna ziahah pawh khan Britain hnuaia awm tura tih zui a ni.
Kumina Queen Elizabeth-i lal kum 75-na lawmna pual hian hmun 39 chuan khawpui nih tumin dilna an thlen a, an zinga pariat chu pek an ni a. Heng zingah hian Doncaster, Bangor leh Dunfermline pawh an tel.
Khawpui an tihah cathedral, university bakah mihring cheng an tam tawk tur a ni a; mahse, he nihna nei tura dan zam mumal tak erawh a awm lo va, lalin minister-te thurawn anga a pek thin a ni.
Khawpui an nih tak avanga hamthatna dawn tur pawh a awm lutuk lem lo va, map-a langsar zawka an chuan leh a mi chengte intihtheihna chu a ni deuh mai.