Aizawl: MNF Adviser Robert Romawia Royte chuan lung an phum tawhna hoah hma an lak mek zel thu a sawi.
Mizo Hnam Run chhung inkhawmah nimin khan thu sawiin Sports Minister Robert Romawia Royte hian, “‘Lung a phum ringawt,’ min ti a, la phumna tur hi hmun 17-ah kan la nei a. Kan phum tawhnaho hi hmalak mek zel a ni,” a ti.
Robert Romawia Royte hian fiamthu thawh nan field chhawng an hmang thin nia a hriat thu sawiin, field chhawng tur hi Zarkawtah ruahman ni mah se, khawtlang neitu lamin an remtih chiah loh avangin Armed Veng-ah hmalak mek a ni a, chhawng liin Mizorama building lian ber ni turin hmalak mek zel a nih thu a sawi.
Phullem phah chungchang sawiin MNF adviser hian phul lem an phah hnem poh leh Mizoram sorkarin chhiah a lak tam avangin an hlawk phah hle niin a sawi a. “Tuten emaw Covid-19 do nana phul lem phah a tha tiin, an lo kaihlekin fiamthu thawh nan hmang an awm a, an hriat chian loh vang a ni,” tia sawiin, eptu MLA-te pawhin an bial chhunga phul lem phah turin an sik ru neuh neuh tawh tih a sawi bawk.
Sports minister hian hri lengin ziaawm lam a pan zel a nih chuan kum tharah taxation minister leh revenue minister te zarah budget a pun ngei a ring tih sawiin, “Chuvangin, SEDP-a kumina kan cover loh hi nakumah pawh kan cover vek theih a rinawm a. SEDP hi nuai thum dawnah hian a tawp mai dawn lo a, kan sorkar chuan kan kal zel dawn a ni,” a ti.
Tourism minister ni bawk hian Mizoramin International Tourism Mart an siam dawn tih sawiin, a scheme hi Rs. nuai 4,000-a bul tan turin thla thar, September hian a lungphum phum a nih tur thu leh Khamrangah Village Eco-tourism dinna tur Rs. nuai 800 senna turin hmalak a ni dawn tih a sawi bawk.