Aizawl : September ni 16, 2022-ah Tawipui South-ah ‘mipui hnenah kal rawh – go to the people- project kalpui a ni dawn a, hemi chungchang ngaihtuah hian nimin khan Lunglei Bawrhsap Kulothungan hovin a kaihhnawih mipawimawh te an thukhawm.
He project hi Lunglei district-ah district Bawrhsap hmalaknaa kalpui chhoh mek a ni a. He hmalaknain a tum ber chu district mipui, a bikin thingtlang khaw kilkhawr zawka cheng te hnena sorkar scheme hrang hrang te hrilhhriata, dilna thehluh tul te a hmuna tihfelpui a ni a. Lunglei Bawrhsap pisa-a thawktute chu khaw hrang hrangah zin kualin sorkar scheme te mipui hrilhfiahin, a mamawh tan Aadhaar enrolment-te an tihsak bawk.
Tawipui South-ah hian Health department-in a thlawna inentirna an buatsaih dawn a, Financial literacy campaign leh Agriculture, Horticulture, AH &Vety, Social Welfare, Rural Development leh Trade & Commerce department ten central scheme hrang hrang te mipui an hrilhfiah bawk ang.