Home Minister Lalchamliana’n Saitual district Superintendent of Police office hmun atan BRTF hmun hlui, Keifang ami ruahman a nih thu leh a sakna tur Rs. nuai 688.72 ruahman a nih thu sawiin, state sorkarah bawhzui mek a nih thu a sawi.
India zalen champha Independence Day kumina Saituala lawmna a hmanpuinaah he thu hi Home Minister chuan a sawi a. SP Saitual office & residential building sakna turin NEC leh ADB-ah te sum dil mek a nih thu a sawi bawk.
Home Minister chuan Saitual district police-in kuminah ruihhlo Heroin (No.4) Gram 56, Rs. nuai 28 man hu leh Ganja Kg 29 an man tawh thu a sawi a. Danin zawrh a khap Foreign cigarette Rs. nuai 23.87 man hu an man tawh thu pawh sawiin, Saitual dist huam chhunga school naupang naupang 368 te hnenah War on drugs signature campaign neih a nih tawh thu a sawi.
Taxation Minister ni bawk Lalchamliana chuan Taxation department-in nikum financial year-a an target Rs. vaibelchhe 717.03 chu vbc 177.71 in an khum tih a sawi a. Kumin June thlengin Tax hrang hrang Rs. vbc 328.29 an la khawm tawh niin a sawi bawk.
Taxation Minister chuan Taxation zonal office nei ngei tura hma an lak thu pawh sawiin, chhan hrang hrang vanga a la hlawhtlin theih rih loh thu leh Saitual chu Aizawl North zone-in a la enkawl rih thu a sawi a. Saitual district-ah GST registered dealer 24 an awm mek thu a sawi.
Disaster Management & Rehabilitation (DM&R) Minister ni bawk Lalchamliana chuan Kuminah Saitual district tan chhiatrupna a thlen palha a tula hman tur Rs. nuai 5 leh COVID19 do nan Rs. nuai 20 pek a nih tawh thu a sawi a. Chhiatna thlen theihna hrang hrang venna tur hnathawh hrang hrang atan Rs. nuai 45 ruahman fel a nih leh tawh thu leh SDMF atan Rs. nuai 21.84 pek a nih leh tawh thu a sawi bawk.