Aizawl : MIZOFED LPG Showroom, Khuangpuilam, Kolasib-in sorkar laipui ruahmannaa Pradhan Mantri Ujjwala Yojana’ hnuaia Kolasib khaw chhunga chhungkaw 89-te hnena a thlawna LPG connection a pekchhuah chu kar kalta Zirtawpni khan bialtu MLA, Supply Minister ni bawk K. Lalrinliana’n a dawngtu tur te hnenah a hlan.
Supply Minister chuan LPG indaihlohna avanga harsatna mipuiin an tawh chungchang sorkar laipuia thlen a nih hnuah hnianghnar zawka Mizoramin eirawngbawlna gas a dawn theihna tura ruahmanna siam a nih thu a sawi a. He ruahmanna avang hian hmasawnna hmuh chhoh mek a nih thu a sawi.
K Lalrinliana chuan scheme duan chhan te sawiin, ti riral mai mai lo tur leh scheme in a duh ang taka țangkai taka hmang turin Gas connection thar dawngtute chu a chah a ni.
MIZOFED LPG, Kolasib-a Manager Reuben K.Lalngaihzuala’n Kolasib-ah tuna PMUY hnuaia hmațhatna dawng te bakah chhungkaw 200 vel dawng tura ruahman leh mek a nih thu a sawi a. PMUY hnuaia hamțhatna dawng chu Kolasib khaw chhung leh pawnah chhungkaw 900 vel an awm tawh thu a sawi bawk.