Aizawl : June 2022 quarter chhunga Champhai district-a bank hrang hranga pawisa dahluh leh pekchhuah tam zawng inthlauhna khaikhinna Credit deposit ratio (CD ratio) chawhrual za-a 70.42 niin, quarter hmasa March 2022 quarter tawpa CD ratio za-a 60 atangin za-a 5.42 in a pung a. CD ratio tha ni tura hniam lam bituk zat za-a 60 chu za-a 10.42 in a khum a ni.
Hemi hun chhung hian Champhai district-a bank hrang hrangah Rs. nuai 45930.60 dahluh niin, bank-in pawisa a pekchhuah zat Rs. nuai 32344.90 a ni thung.
Kum 2022-2023, kumin June thla tawp thlenga annual credit plan (ACP) hnuaia hnathawh – Priority sector atana target 6884 (Rs nuai 14511.51) atangin 909 (Rs nuai 1940.06), za-a 13.36 tihhlawhtlin a ni a, Non priority sector hnuaia target 159 (Rs nuai 3300) atangin 71 (Rs nuai 1466.09) za-a 44.42 tihhlawhtlin a ni.
Hemi quarter chhung vek hian Pradhan Mantri Mudra Yojana (PMMY) kaltlangin Sishu hnuaiah mi 9, Kishore hnuaiah mi 46, Tarun hnuaiah mi 17, Stand up India hnuaiah mi 7, an vaiin mi 79 te hnenah loan Rs nuai 219.57 pekchhuah tawh a ni bawk.
Kumin June quarter tawp thlenga Social security scheme hnuaia inziaklut tawh zat – Pradhan Mantri Jan Dhan Yojana (PMJDY) hnuaiah mi 21173, Pradhan Mantri Jeevan Jyoti Bima Yojana (PMJJBY) hnuaiah mi 10304, Pradhan Mantri Suraksha Bima Yojana (PMSBY) hnuaiah mi 18506 leh Atal Pension Yojana (APY) hnuaiah mi 698 an ni a. Priority sector hnuaiah non performing assets (NPA) Rs nuai 4268.96 (14.77%) leh Non priority sector hnuaiah NPA Rs. nuai 169.77 (1.43%) a awm bawk a ni.
Champhai district-a bank hrang hrang kaltlanga hmalaknate thlirletin nimin khan District consultative committee (DCC) an thukhawm a. DCC chuan ATM kha- wlah Rs. 500 note bakah Rs.100 leh Rs 200 note-te lak chhuah theiha a awm reng theihna tura hma la turin bank branch hrang hrangte a hriattir a. Bank te chu customer-te lo pui thuaitu tur ‘May I Help You Desk’ siam vek tura tih niin, FLC kaltlanga bank dawr dan, bank kaltlanga hamthat na awm inhrilhhriat leh security chungchang hriattur inzirtirna tam zawk neih rawtin, zirna in sang zawkahte September thla chhunga inzirtirna kalpui nise an ti.
Bank hrang hrangte chu mipuite hnena bank chhawr tangkai dan inzirtirna financial literacy camp thla tin vawi 2 tal nei tura hriattir an ni a, mipui ten social security scheme an chhawr tangkai theih nan a tul anga hmalak an rawt bawk.