- Ruata
Tata Motors chuan chuan an SUV hoah Jet Edition an tlangzarh thar a, hei hi an SUV pathum Nexon, Harrier leh Safari-ah te a ni dawn a ni.
A hmain Tata Motors hian an SUV hoah hian Dark Edition leh Kajiranga Edition an lo tlangzarh tawh a. Tunah hian Edition thar a lo chhuak leh ta a, he edition thar Jet Edition-ah pawh hian edition dang ang bawkin design leh thildangah a danglam leh deuh dawn a, kentel pawh a rawn nei thar dawn bawk a ni. Tata Nexon Jet Edition hi Rs. Nuai 12.13 man atangin a intan dawn a, Tata Harrier Jet Edition hi Rs. Nuai 20.90 man atangin a intan thung ang a, Safari Jet Edition hi Rs. Nuai 21.45 man atangin a intan thung dawn a ni.
Heng Tata SUV Jet Edition ho hi anmahni theuha a variant sang ber XZ+ trim nghahchhan zela duan an ni a. Edition dang ang bawkin a pangngai ho nen a khawl lamah chuan a inang vek dawn thung a ni. A man bik hi kimchang deuha tarlan dawn chuan Safari Jet Edition hi Rs Nuai 21.45-22.65 man inkar a ni ang a, Harrier Jet Edition hi Rs Nuai 20.90-22.20 inkar niin Tata Nexon Jet Edition thung hi chu Rs Nuai 12.13-14.08 inkar man a ni thung dawn a ni.
Rawng thar leh kentel thar
Tata Jet Edition SUV thar zawng zawng hian “Starlight” dual-tone paint scheme with bronze body & silver roof a nei vek a. Tata Safari, Harrier leh Nexon Jet Edition te hian blacked-out alloy wheels leh silver skid plate (a hma leh hnungah) a nei a. A chhunglamah pawh he new edition hian dual-tone white & black scheme with bronze treatment & stitching thar hlak a ni a, a mawiin a changkang em em a ni.
Tata Safari leh Harrier Jet Edition bik hian himna hmanraw thar hrang hrang – driver drowsiness alert, panic brake alert leh after-impact braking te a rawn keng tel a. Hei bakah hian Safari Jet Edition hian USB C-type charger thutna tlar tinah leh lu nghahnaah te a nei vek a ni.
Harrier Jet hian electronic parking brake leh a ke zawng zawngah disc brake te a nei bawk a. Tata Nexon Jet Edition hian wireless charger a nei thar bawk a. Hemi tih lohah chuan a kentel leh thildang hrang hrangah a pangngaia XZ+ trim nen a kentel a inang tlangpui a ni.
A khawl
Nexon Jet Edition hian khawl chi hnih – 120bhp power pechhuak thei, 1.2-litre 3-cylinder turbocharged petrol leh 110bhp power pechhuak thei, 1.5-litre 4-cylinder turbo-diesel khawl te a hmang a. Transmission lamah chuan 6-speed manual leh 6-speed AMT (Automated Manual Transmission) te a nei bawk a ni. Tata Safari leh Harrier Jet Edition ve thung hi chuan 2.0-litre 4-cylinder turbocharged diesel engine, FCA (Fiat Chrysler Automobile) atanga lak an hmang a. He khawl hian 170bhp power leh 350Nm torque lai mai a pechhuak thei a ni. Gearbox lamah chuan 6-speed manual leh Hyundai atanga lak 6-speed torque converter automatic te duhthlan tur a awm thung a ni.
Tata SUV te hi India SUV neih zinga hralh kal leh changkang tak an ni a. Tuna Edition thar lo chhuak leh pawh hi Tata SUV ngaina tan leh lei tum tan chuan chanchinthar lawmawm tak mai a ni a, lirthei leituten duhthlan tur dang tha leh changkang tak an nei leh ta a ni.