Real Madrid tan star striker Karim Benzema bawk a inlar a. Huntawp dawn tawh lamah goal hnih khungin Espanyol lakah 3-1 in a team a chak pui.
Los Blancos hian Pathianni zanah tun La Liga season a match thum atanga a vawi thum nan hnehna an chang a. La Liga table chung ber luah chhunzawmin an French striker hian a tawp minute 12 chhungin a goal te hi a khung.
RCDE Stadium a inkhelah Real Madrid in minute 12-naah goal an khung a. Manchester United zawmtu Casemiro thlaktu France midfielder beiseiawm Aurelien Tchouameni ball siamsak chu Vinicius Junior chuan goal-ah a chantir.
Kum 22 mi Tchouameni hian Euro maktaduai 80 man a nihna lantirin inkhel thununna kawngah leh Real goal nawr tihnatna kawngah a thawhhlawk.
Mahse Espanyol in halftime dawnah goal an khung a, Joselu chuan hun remchang a neih hloh lovin an si phurh a sut.
Second half-ah team pahnihten chance an nei ve ve a, Real goalkeeper Thibaut Courtois chuan Joselu khung belh tur a tan hnuah Javi Puado pawhin chance a nei. Lehlamah Benzema goal pawm loh a awm hnuah minute 88-naah goal a khung a. Espanyol goalkeeper Benjamin Lecomte hnawhchhuah a nih hnuah freekick atangin an goal thumna a khung.
Inkhel dangah kum 34 mi strikerRobert Lewandowski chuan a vawi hnih nan goal hnih a khung a. Barcelona in 4-0 in awlsam takin Real Valladolid an hneh.
Polish striker Lewandowski bakah Pedri leh Sergi Roberto ten goal an khung.